Турыстам на вока: не забудзьцеся пераправерыць свой пашпарт

Каб не сапсаваць тур, правярайце патрэбныя для выезду за мяжу дакументы загадзя.

Парадак перасячэння дзяржаўных межаў ніхто не скасоўваў. Здавалася б, усе аматары падарожжаў пра гэта ведаюць, аднак інцыдэнты на мяжы па-ранейшаму здараюцца. Прычым нават пры наяўнасці ўсіх патрэбных дакументаў.

Як адзначылі карэспандэнту агенцтва «Менск-Навіны» ў атрадзе памежнага кантролю «Менск», яны пра такія гісторыях ведаюць не па чутках, таму імкнуцца папярэдзіць непрыемныя для турыстаў сітуацыі. Прапісная ісціна, але многія пра яе забываюць: пры атрыманні новага пашпарта неабходна вельмі старанна з ім азнаёміцца.

- Варта звярнуць асаблівую ўвагу на рэквізіты, запоўненыя работнікамі органа, які выдае дакумент, - тлумачыць начальнік атрада памежнага кантролю «Менск» Мікалай Валаводаў. - У выпадку знаходжання недакладнасцяў або памылковых звестак варта іх выправіць. Для гэтага трэба звярнуцца ў орган, які выдаў дакумент.

Плануючы паездку, звярніце ўвагу на тэрмін дзеяння пашпарта. А некаторым грамадзянам варта даведацца аб наяўнасці часовых абмежаванняў права на выезд з краіны. Гэтую інфармацыю пададуць ў падраздзяленні грамадзянства і міграцыі МУС Рэспублікі Беларусь, але толькі пры падачы асабістага дакумента.

- Непаўналетнія грамадзяне выязджаюць за межы Беларусі па сваіх пашпартах у суправаджэнні законнага прадстаўніка, - удакладняюць ў атрадзе. - Наяўнасць дакумента, які пацвярджае такі статус, абавязковая! Непаўналетнія таксама могуць перасякаць мяжу з пісьмовай згоды законных прадстаўнікоў. Папера павінна быць заверана органам або асобай, якая мае права правядзення натарыяльных дзеянняў, альбо ўпаўнаважанай службовай асобай адпаведнага структурнага падраздзялення грамадзянства і міграцыі органаў унутраных спраў.