Егіпецкія ісламісты замінавалі Суэцкі канал
- 6.07.2015, 20:39
- 27,662
У Егіпце арыштаваныя сябры арганізацыі «Браты-мусульмане», якія збіраліся, учыніць тэракт з мэтай блакавання Суэцкага канала.
Пра гэта паведамляе Lenta.ru са спасылкай на Reuters.
У склад тэрарыстычнай групы ўваходзілі 13 чалавек, у тым ліку супрацоўнік адміністрацыі канала. Частку падазраваных атрымалася арыштаваць, астатніх шукаюць. Змоўнікі паспелі закласці бомбы ў збудаванні ачышчальнай сістэмы і сістэмы электразабеспячэння Суэцкага канала, а таксама закапалі некалькі выбуховых прылад на берагах.
Новую кампанію супраць «Братоў-мусульман», дзейнасць якіх забароненая ў Егіпце, сілавікі распачалі пасля таго, як 29 чэрвеня аўтамабіль егіпецкага генпракурора Хішама Бараката падарваўся на фугасе ў Геліополі. Ад атрыманых ран чыноўнік памёр. Адказнасць за тэракт узяла на сябе групоўка «Народны супраціў Гізы», якая мела намер адпомсціць за смяротныя прысуды ісламістам.
Пасля гэтага 1 ліпеня егіпецкія сілавікі ў Каіры ліквідавалі дзевяць высокапастаўленых чальцоў «Братоў-мусульман». Паводле версіі МУС Егіпта, яны планавалі тэракты супраць прадстаўнікоў СМІ ды дзяржструктур. Ісламісты заявілі, што іх лідары «былі спакойна забітыя», і заклікалі да паўстання супраць «мясніка» - егіпецкага прэзідэнта Абдэля Фатаха ас-Сісі.