Берасцеец запусціў каменем у аўтамабіль ДАІ
7- 25.08.2015, 16:40
- 16,833
Інцыдэнт адбыўся раніцай 25 жніўня на адной з вуліц Берасця.
Усё пачыналася цалкам мірна: супрацоўнікі Дзяржаўтаінспекцыі спынілі «Форд-Гелэксі» за тое, што той не прапусціў пешахода на пераходзе, піша «Интерфакс».
- Падчас складання адміністрацыйнага матэрыялу ў дачыненні да парушальніка, аўтаінспектар пачуў удар у задняе ветравое шкло, пасля чаго аскепкі пасыпаліся як у салон патрульнага «Опеля», так і на праезную частку дарогі, - распавялі ў Берасцейскай абласной ДАІ. - выйшаўшы з машыны, інспектар убачыў маладзёна, што кінуўся на ўцёкі. Да затрымання хулігана далучыўся і пасажыр «Форда».
Для затрымання маладога чалавека давялося ўжыць кайданкі і фізічную сілу. Пасля гэтага была выкліканая следча-аператыўная група, затрыманага перадалі для далейшага разгляду.
Пазней, паводле інфармацыі ДАІ, хуліган апынуўся ў УАЗ «Берасцейскі абласны псіханеўралагічны дыспансер».