У Менску пачаўся рух трамваяў вуліцай Казлова

Сёння ў Менску аднавілася рух трамваяў на адцінку ад плошчы З.Бядулі да вуліцы Батанічнай.

Раней на гэтым адцінку вялася рэканструкцыя трамвайных рэек. Падчас яе атрымалася таксама развязаць усе пытанні арганізацыі інжынерных сетак і г.д. Цяпер рэйкі замененыя, і трамваі аднавілі рух звыклым маршрутам, піша onliner.by.

Раней ужо быў адкрыты рух трамваяў ад вуліцы З.Бядулі да вуліцы Платонава.

Такім чынам, на сёння застаецца закрыты рух трамваяў да чыгуначнага вакзалу. Аднак яго аднаўлення чакаць яшчэ доўга. Як паведамлялася раней, у сувязі з будаўнічымі работамі перасадачнага вузла з трэцяй на першую лінію Менскага метрапалітэна рух трамваяў вуліцай Бабруйскай забаронены да 31 сакавіка 2017 года.

Пакуль наўзамен трамваяў пасажыраў развозяць часовыя аўтобусныя маршруты. Яны арганізаваныя такім чынам, каб ахопліваць патрэбны адцінак, які застаўся без трамвайнага злучэння, і пры гэтым ўлічваецца патрэба разваротных колаў для аўтобусаў, каб не ствараць праблем для транспартнай плыні. У «Мінсктрансе» адзначаюць, што на гэты момант аўтобусныя маршруты спраўляюцца з пасажыраплынню. Калі сітуацыя зменіцца, інтэрвал руху будзе скарочаны.