Былы дэкан з Акадэміі кіравання: У Амерыцы 48 мільёнаў жывуць на вуліцы

Маналог Мікалая Шчокін, прысвечаны правам чалавека, дае ўяўленне, як успрымаюць агульначалавечыя каштоўнасці беларускія ідэолагі.

Згодна з вынікамі даследавання расейскага сацыялагічнага «Левада-цэнтра», у Расеі зменшыўся запыт на дэмакратыю. Насельніцтва гатова пазбавіцца часткі свабодаў у абмен на паляпшэнне дабрабыту. Гэтая тэма абмяркоўвалася ў праграме «Клуб рэдактараў» на канале «Беларусь 1», піша «Наша нiва».

Адным з самых актыўных удзельнікаў дыскусіі быў Мікалай Шчокін. Раней ён узначальваў Інстытут дзяржаўнай службы пры Акадэміі кіравання, а цяпер быў прадастаўлены проста як кандыдат філасофскіх навук. Апанентам Шчокіна быў рэдактар «Эканамічнай газеты» Леанід Фрыдкін.

Шчокін: Давайце адыдзем ад крайнасцяў. Сапраўды, свабода слова там, свабода перамяшчэння... Гэта ўсё, кажуць, дэмакратыя. А права на працу - гэта дэмакратыя? Гэта дэмакратыя. Чаму яны хочуць адысці ад свабоды слова? Таму што ў іх няма права на працу, не замацавана гэта. Яны ж хочуць працаваць, хочуць сябе рэалізаваць, а гэта і ёсць тая самая дэмакратыя. Якая розніца, на якой пасадзе?

Фрыдкін: Вельмі вялікая розніца.

Шчокін: Розніцы няма.

Фрыдкін: І вельмі вялікая розніца паміж правам на працу і архіпелагам ГУЛАГ.

Шчокін: Не трэба крайнасцяў. Можна быць без працы, без заробку і са свабодай слова. Але гэта свабода слова нікому не патрэбная. У ЗША з 300 мільёнаў насельніцтва 48 мільёнаў проста атрымліваюць талоны на ежу, яны не працуюць наогул.

Фрыдкін: Але яны не здыхаюць з голаду.

Шчокін: Яны не здыхаюць, яны проста жывуць на вуліцы.

Фрыдкін: Прама ўсе 48 мільёнаў, і ўсё на вуліцы?

Шчокін: Так, практычна так.

Фрыдкін: І вы праехалі па Амерыцы і бачылі іх на вуліцы? Вы гэтую казачку пакіньце, калі ласка.

Шчокін: Але мы не ЗША. У нас няма такіх рэсурсаў, як там. Права на працу - слуп нашага грамадства. І па-іншаму тут не будзе.