Плошча лясных пажараў у Бураціі перасягнула 150 тысяч гектараў
8- 31.08.2015, 18:08
- 8,455
У Бураціі дзейнічае рэжым надзвычайнай сітуацыі.
Плошча лясных пажараў у Бураціі перасягнула 150 тысяч гектараў, піша «Новая Газета» са спасылкай на Рэспубліканскае агенцтва лясной гаспадаркі.
Паводле звестак прэс-службы агенцтва, сёння раніцай у рэспубліку прыбылі 100 лясных пажарных з Ханты-Мансійскай аўтаномнай акругі. Пажарных накіравалі ў населеныя пункты Баргузін, Турка, Грамячынск, Тэгда, Кабанск. Усяго ў тушэнні пажараў удзельнічаюць больш за 2500 чалавек.
За мінулыя дзень прадстаўнікі лясной аховы ліквідавалі 3 пажары плошчай блізу 3,5 тысячы гектараў. Пажары зарэгістраваныя ў Прыбайкальскім, Баргузінскім, Баўнтоўскім, Кабанскім, Заіграеўскам, Курумканскам, Паўночна-Байкальскім, Харвнскім раёнах, а таксама ў прыгарадзе Улан-Удэ, Забайкальскім нацыянальным парку, Джэргінскім, Байкальскім, Баргузінскім запаведніках.
У другой палове ліпеня пачаў гарэць Байкал. Са стыхіяй сваімі сіламі спрабавалі справіцца Бурація ды Іркуцкая вобласць. Спыніць катастрофу не змог і міністр МНС Уладзімір Пучкоў. Прыляцеўшы на Байкал ў сярэдзіне жніўня, кіраўнік МНС абяцаў справіцца з агнём за два з паловай дні, у выніку абяцанне міністра нават давялося выдаліць з сайта міністэрства.