Чэмпіён Магілёўшчыны ў стральбе ваюе на баку ДНР?

29-гадовы Андрэй Ш. адвучыўся ў звычайнай Аршанскай школе і трапіў на службу ў віцебскую дэсантуру - у элітны 33-ці гвардзейскі атрад спецпрызначэння.

Вышэйшую адукацыю і званне афіцэра ён атрымаў у міліцэйскай навучальнай установе. Толькі праз яго сяброў знаходзім фатаграфію, дзе ён фігуруе ў міліцэйскай форме, паведамляе «Еўрарадыё».

Такім чынам, Андрэй Ш. пасля атрымання афіцэрскіх пагонаў апынуўся ў Магілёве. А потым - у Маскве.

Інфармацыя аб беларусе ў 2015 годзе разышлася па сетцы, дзякуючы ўкраінскаму сайту «Міратворац». Праўда, аўтары артыкула, хутчэй, выказваюць здагадкі. Сам Андрэй не афішуе свой удзел у баявых дзеяннях і не выдае фатаграфіі з Данеччыны. Пераважна ў яго ў сацсетках - ілюстрацыі гульняў у страйкбол. Мужчына - удзельнік магілёўскай каманды «САХР «Булат».

Сёлета ў канцы траўня Андрэй Ш. стаў чэмпіёнам Магілёўшчыны ў практычнай стральбе з пнеўматычнай зброі. Спаборніцтвы праводзіліся пры падтрымцы БФСТ «Дынама» і Федэрацыі практычнай стральбы.

«Ён не мог нікуды ездзіць і тым больш удзельнічаць у баявых дзеяннях. Тое, што было напісана на сайце «міратворцы»- гэта інфармацыйная вайна. Напрыклад, звесткі пра тое, што ваяваў у Грузіі. Ён фізічна не мог знаходзіцца там, таму што працаваў у дзяржорганах на той момант», - сцвярджае камандзір «САХР «Булат».

Тым часам, вядомыя байцы з ДНР сцвярджаюць адваротнае і кажуць аб беларусе Андрэю Ш. толькі самае добрае. Падобна на тое, што за час вайны на ўсходзе Украіны ён сябе добра праявіў і зрабіў імя.

Гэты скрыншот быў апублікаваны на сайце psb4ukr.org. Пасля гэтага Андрэй Ш. прыбраў запіс з сацсетак.

«Прабачце, я вам нічым дапамагчы не магу. Мне гэта не вельмі прыемна. Ён з намі не жыве і мала што распавядае. Я сама хацела б ведаць больш», - з трывогай у голасе адказвае на званок маці Андрэя.

На яго старонках у сацыяльных сетках - вольны доступ да сяброў. Амаль кожны дзесяты чалавек - з Данецка, Луганска або Горлаўкі (гарады, якія знаходзяцца пад кантролем прарасейскіх байцоў). Многія з гэтых людзей не хаваюць свайго ўдзелу ў вайне.

На старонцы ў сацсетках Андрэй Ш. публікуе вось такія абстрактныя фотаздымкі. Не зразумела, ці браў ён беспасярэдні ўдзел у падзеях, паказаных на ілюстрацыі.

Былы Мар'інагорскі спецназавец Г. (таксама ваюе ў «Спарце») падчас інтэрв'ю згадвае, што не бачыў Андрэя Ш. ужо больш за месяц. І апісвае яго як «байца высокага класа».

Яшчэ шэраг байцоў з «ДНР» ускосна пацвердзілі, што Андрэй Ш. ваяваў на баку прарасейскіх фармаванняў. Але даваць дэталёвую інфармацыю ніхто не наважваецца. Рабіць гэта забаранілі іх камандзіры.

Вядома, што ў мірным жыцці Андрэй зарабляе на жыццё ў Маскве. Былі непацверджаных звесткі, што сёння ён служыць у расейскіх спецпадраздзяленнях. Знаёмыя ж беларуса кажуць, што працуе ахоўнікам у элітных расейскіх гатэлях і забаўляльных цэнтрах.

Нагадаем, што афіцыйна беларускія праваахоўнікі абяцаюць прыцягваць да крымінальнай адказнасці тых, хто ўдзельнічае ў вайне на ўсходзе Украіны як з аднаго боку, так і з другога. Але дагэтуль не аб'яўлялася хоць бы аб адной пачатай справе.