Домрачава прапусціць найбліжэйшы сезон

Трохразовая Алімпійская чэмпіёнка і ўладальніца Вялікага Хрустальнага Глобуса 2014/15 Дар'я Домрачава наважыла ўзяць паўзу ў спаборніцтвах на адзін год.

Пра гэта паведамляе «Прессбол».

«Усе добранька абдумаўшы і прааналізаваўшы, я прыняла пастанову прапусціць спаборніцкі сезон 2015-2016. Першая думка пра такую магчымасць і жаданне аднавіць сілы з'явіліся ў мяне яшчэ пасля завяршэння праведзенага кубкавага сезона. Маёй памылкай стала тое, што я не дастаткова прыслухалася да патрэбаў арганізма ў той момант. З'ездзіўшы да мора, скінуўшы стомленасць сезону, і як здавалася, адпачыўшы, была прынятая пастанова рыхтавацца да новага спаборніцкага года. План быў такім: прапусціць частку стартаў, каб знізіць менавіта спаборніцкую насычанасць сезону. Да трэніровак прыступіла з вялікім энтузіязмам і, як здавалася, усё ішло добра.

Але арганізм не падманеш. І «схоплены» монануклеёз стаў своеасаблівым сігналам - вярнуў мяне да майго першапачатковага жадання. Можна, вядома, уперціся, і ўсё ж выступаць гэтай зімой, але пракансультаваўшыся са спецыялістамі і прыслухаўшыся да сябе, прыйшла да высновы, што больш разумнай пастановай стане пропуск сезону. Упэўненая, гэта карысна для мяне, дазволіць аднавіць сілы і матывавацца на год наступны.

Усіх цікавяць мае найбліжэйшыя планы. На гэты момант самае галоўнае - гэта канчаткова аднавіцца без эмацыйных і фізічных перагрузак. Наступны месяц, па рэкамендацыях лекараў, я правяду ў вельмі спакойным рэжыме. Далей буду паступова прыступаць да базавых трэніровак, вядома ж, абапіраючыся на самаадчуванне і паказчыкі аналізаў. Узімку планую шчыльна заняцца тэставаннем і адборам сваіх лыж для наступнага сезону, у гэтым годзе ў мяне з'яўляецца выдатная для гэтага магчымасць. Увогуле, буду трэніравацца індывідуальным графікам. Каб разнастаіць і зрабіць працу яшчэ больш цікавай, планую ўключыць у свой трэніровачны план нестандартную для мяне фізічную нагрузку, пазаймацца з пісьменнымі спецыялістамі з іншых відаў спорту. Увогуле, разглядаю гэты год для сябе як своеасаблівую перазагрузку.

Пакуль я радуюся самым простым рэчам. Напрыклад, з'явіўся час пачытаць, сустрэцца з сябрамі, пагуляць па горадзе і схадзіць у тэатр. У цвёрдым спартовым рэжыме шмат чаго не паспяваеш і сёння ў гэтым плане адчуваю сябе нашмат вальнейшай. Няма пастаяннага ціску і самаабмежаванняў у графіку. Я радуюся магчымасцям і атрымліваю задавальненне ад жыцця. Вядома, у мяне ёсць вялікі запас сур'ёзных цікавых праектаў. Да абдумвання і ажыццяўлення некаторых з іх з'яўляецца магчымасць прыступіць. Але ўсё роўна гэта здарыцца толькі пасля таго, як фізічна і эмацыйна буду адноўленая канчаткова», - заявіла Домрачава.