Пры падрыхтоўцы да Дажынак ў Талачыне раскапалі падвалы XIX стагоддзя

Склеп будынка, пабудова якога датуецца дзевятнаццатым стагоддзем, выявілі ў Талачыне пры падрыхтоўцы да абласных Дажынак.

Экскаватар ў чарговы раз зачэрпнуў грунт і... адкрыў разяўленую пустэчу, піша kp.by.

- І як толькі дагэтуль не абвалілася тут нічога! - дзівіліся відавочцы. Узгадвалі, што калі абсталявалі ўваход у парк з боку плошчы, таксама нешта такое было - хтосьці з рабочых выпусціў інструмент у дзірку, што адкрылася ў зямлі.

- Склеп збудаваны з чырвонай цэглы, з каменнымі ўстаўкамі, гэта так званая тэхналогія «прускага мура», - распавёў рэдактар раённай газеты «Наша Талачыншчына» Віктар Бірукоў, ён адным з першых прымчаўся аглядаць знаходку.

Мяркуючы па даце, што захавалася на каменным муры - 1898 - будынак памерам 7х14 метраў, ад якога застаўся толькі падвал, быў пабудавана ў канцы дзевятнаццатага стагоддзя. Меркаванні аб тым, што менавіта знаходзілася ў гэтым будынку, падзяліліся. Выказваліся здагадкі аб тым, што гэта магла быць лаўка ці складское памяшканне. Успаміны Спрынцы Рокхінд, жыхаркі дарэвалюцыйнага Талачына, навялі на думку аб тым, што падмурак можа быць астаткам нейкай «канторы казённага рабіна». Але мабыць, самая праўдападобная версія - склеп застаўся ад пажарнай часткі, якую знеслі ў сямідзесятых гадах.

Зараз склеп і падмурак зноў «пахавалі», добраўпарадкаванне райцэнтра доўжыцца.

- Такія магутныя старыя падвалы ёсць пад шматлікімі старымі будынкамі ў Талачыне, - распавёў начальнік аддзела культуры, ідэалогіі і ў справах моладзі Талачынскага райвыканкама Валерый Зайцаў. - І некаторыя з іх дагэтуль выкарыстоўваюцца.