АБСЕ апублікавала справаздачу аб падзеях ля Рады

У справаздачы місіі сказана, што ў непарадках бралі ўдзел амаль 3 тысячы мітынгоўцаў, 50 з якіх былі ўзброеныя дубінкамі і ланцугамі.

Чальцы Спецыяльнай маніторынгавай місіі Арганізацыі бяспекі і супрацоўніцтва ў Еўропе (СММ АБСЕ) назіралі за ўчорашнімі падзеямі каля Вярхоўнай Рады Украіны, пачынаючы з мірнай акцыі і заканчваючы сутыкненнямі. Пра гэта ідзе гаворка ў справаздачы назіральнікаў, апублікаванай на сайце місіі, паведамляе ЛІГАБізнесІнформ.

"31 жніўня з 09:00 СММ назірала за акцыяй пратэсту ля будынка Вярхоўнай Рады ў Кіеве. Блізу 3 тысяч чалавек (мужчыны і жанчыны рознага веку) са сцягамі Свабоды, Радыкальнай партыі і УКРОПа пратэставалі супраць змен у Канстытуцыю, галасаванне аб якіх праходзіла ў парламенце. Першапачаткова мерапрыемства мела мірны характар і быў парадак, без якіх-небудзь непарадкаў", - сказана ў тэксце дакумента.

Паводле звестак АБСЕ, у першай і другой палове дня 31 жніўня “будынак ахоўваўся шчыльным колам супрацоўнікаў спецвойскаў для аховы грамадскага парадку (блізу 1000 чалавек), а таксама Нацгвардыі (блізу 1000 чалавек) у ахоўным рыштунку".

"Былыя народныя дэпутаты і дзейныя лідары Свабоды і Радыкальнай партыі былі ў натоўпе ўдзельнікаў пратэсту", - сказана ў справаздачы.

Як адзначаецца ў дакуменце, як мінімум 50 мітынгоўцаў у першых шэрагах узялі ўдзел у сутыкненнях з праваахоўнікамі. "Некаторыя з іх былі ўзброеныя ланцугамі, а некаторыя, у тым ліку і жанчыны, - дубінкамі", - падкрэслілі ў АБСЕ.

Паводле звестак СММ, пад 13:00 дэманстрантаў усхвалявала навіна аб прыняцці змен у Канстытуцыю ў першым чытанні, і "яны пачалі паліць шыны і дрэва ля галоўнага ўваходу ў будынак, а таксама пачаліся бойкі (слоўныя і фізічныя з выкарыстаннем кіёў) з праваахоўнікамі, якія ўтварылі кардон ля будынка ў поўным ахоўным рыштунку. Вайскоўцы ўтрымлівалі абарону ад пратэстоўцаў пры дапамозе гумовых дубінак і шчытоў".

Паведамляецца, што назіральнікі бачылі блізу 20 пратэстоўцаў (мужчын і жанчын) з затуленымі тварамі, некаторыя з іх - у масках. 150 пратэстоўцаў былі ў камуфляжы, сярод іх - з нашыўкамі Легіёна Свабоды, Данбаса, Правага сэктара, батальёнаў Тарнада і Січ.

"Місія бачыла кантэйнеры са слезацечным газам, якія кідалі і праваахоўнікі, і пратэстоўцы з задніх шэрагаў, выклікаючы невялікія выбухі. За колам праваахоўнікаў знаходзіліся журналісты, якія здымалі пратэст", - гаворыцца ў дакуменце.

Як паведамляе АБСЕ, а 13:45 СММ пачула вельмі гучны выбух, паводле сваіх ацэнак, ад гранаты. Пасля выбуху назіральнікі ўбачылі параненых праваахоўнікаў з моцнымі крывацёкамі і некалькі пратэстоўцаў з менш сур'ёзнымі ранамі. СММ зафіксавала самаходы хуткай дапамогі, "якія прыязджалі на месца падзеі за кардонам праваахоўнікаў і, сама менш, восем праваахоўнікаў, якіх неслі да хуткіх дапамог".

"Падзеі развіваліся хаатычна", - адзначылі назіральнікі.

У справаздачы падкрэсліваецца, што агулам праз непарадкі ў цэнтры Кіева раны атрымалі звыш 120 чалавек, чацвёра з якіх - знаходзіліся ў цяжкім стане, а адзін чалавек загінуў.