Кіраўнік МЗС Люксембурга: ЕЗ рыхтуе новы тып пагадненняў з Беларуссю
- 4.09.2015, 21:41
- 5,061
У новым пагадненні ЕЗ з Беларуссю і Арменіяй не будзе мытных ільгот.
Еўразвяз рыхтуе з Беларуссю і Арменіяй новы варыянт пагадненняў, якія будуць звязваць гэтыя краіны і ЕЗ значна менш, чым пагадненне аб асацыяцыі, паведаміў кіраўнік МЗС старшыні ў ЕЗ Люксембурга Жан Асельборн, паведамляе РІА "Новости".
Ён адзначыў, што "мытных ільгот у гэтым пагадненні не будзе". "Там будзе шмат чаго, але мы цяпер гэта толькі распрацоўваем", - заявіў міністр на просьбу падрабязней распавесці аб новым пагадненні.
"Мы зрабілі прапанову Арменіі, Арменія адказала станоўча. У Беларусі назіраецца рух не ў адмоўным накірунку. Еўропа не павінна выпускаць магчымасць, якая з'яўляецца (у дачыненнях) з гэтай краінай. Не трэба думаць аб рэжыме, трэба думаць пра насельніцтва", - заявіў міністр.
У праграму Усходняга партнёрства ўваходзяць Азербайджан, Арменія, Беларусь, Грузія, Малдова і Украіна. Грузія, Украіна і Малдова падпісалі пагадненне аб асацыяцыі і зоне свабоднага гандлю з ЕЗ у чэрвені 2014 года.