У Турцыі пасля перавароту пад арыштам застаюцца больш за 35 тысяч чалавек

Яшчэ ў дачыненні да 82 тысяч вядзецца следства.

Праз больш чым тры месяцы з моманту няўдалай спробы путчу ў Турцыі пад арыштам знаходзяцца больш за 35 тысяч чалавек. Пра гэта ў нядзелю, 23 кастрычніка, паведаміў міністр юстыцыі краіны Бекір Боздаг, паведамляе dw.com са спасылкай на тэлеканал NTV. Акрамя таго, паводле ягоных слоў, следства вядзецца ў дачыненні да 82 тысяч падазраваных. Яшчэ 4 тысячы чалавек знаходзяцца ў вышуку.

У канцы верасня турэцкія ўлады паведамлялі, што колькасць узятых пад варту з моманту падаўлення дзяржаўнага перавароту складала 32 тысячы чалавек, у дачыненні да 70 тысяч вяліся следчыя працэдуры.

Акрамя таго, блізу 100 тысяч вайскоўцаў, чыноўнікаў, паліцыянтаў і суддзяў былі звольненыя, або часова адхіленыя ад працы.

Спроба путчу была прадпрынятая ў Турцыі 15 ліпеня. Пасля падаўлення перавароту ўлады ўвялі ў краіне рэжым надзвычайнага становішча тэрмінам на тры месяцы.

У кастрычніку рэжым надзвычайнага здарэння быў падоўжаны да сярэдзіны студзеня. У арганізацыі перавароту ўлады Турцыі абвінавачваюць ісламскага прапаведніка Фетхулаха Гюлена, які пражывае ў ЗША з 1999 года.