Каспараў распавёў, як Захад павінен супрацьстаяць Пуціну

Раскол элітаў у Расеі можа прывесці да падзення рэжыму прэзідэнта Уладзіміра Пуціна.

Такое меркаванне выказаў расейскі апазіцыйны палітык Гары Каспараў у інтэрв'ю "Радио Свобода".

«Першаснай будзе пазіцыя Захаду, якая паставіць пуцінскі рэжым і пуцінскія эліты ў сітуацыю ізаляцыі, калі гэта будуць не проста нейкія санкцыі, якія яны ў стане абыходзіць, а гэта будзе жорсткае асяроддзе па ўсім перыметры», - растлумачыў ён.

На думку апазіцыянера, Захад цяпер выкарыстоўвае свой эканамічны патэнцыял у барацьбе з Расеяй прыкладна на 10%, а перад паплечнікамі Пуціна пакуль не ўстала праблема выбару, ці падтрымліваць прэзідэнта коштам уласных інтарэсаў. Ён дадаў, што Расеі не спатрэбяцца жорсткія санкцыі, накшталт тых, якія ўжывалі ў дачыненні да Ірану.

«Рэжым Пуціна не гатовы нават да палавіны таго, што мог вынесці іранскі рэжым, таму што той ступені інтэграцыі на Захад там блізка не было. Гэта значыць на самай справе тут праблем паўстане значна больш, нават калі Захад пойдзе хоць бы часткова на тыя санкцыі, якія былі супраць Ірана», - падкрэсліў Каспараў.

Ён дадаў, што ёсць і іншыя спосабы супрацьстаяння пуцінскаму рэжыму, здольныя ўтаймаваць агрэсіўныя дзеянні Расеі.

«Пастаўкі зброі сірыйскім паўстанцам, і ў першую чаргу пастаўкі зброі ва Украіну - гэта на самай справе тыя геапалітычныя крокі, якія могуць пачаць дэманстраваць расейскай эліце вайсковай, кагэбэшнай, бізнэс-эліце, што часы, калі Захад адступаў, скончыліся», - распавёў палітык.

Ён адзначыў, што ў выпадку абвастрэння ў расейскіх элітаў паўстане выбар падтрымліваць «вар'яцкага дыктатара» да канца, або шукаць іншыя варыянты.

«І тут вельмі важна, каб існавала некаторая альтэрнатыва. Яна можа быць дастаткова радыкальнай, усё роўна будзе люстрацыя, усё роўна будзе сыход ад улады значнай часткі цяперашняга апарату, але пры гэтым ёсць магчымасць сысці мірна... І чым больш эфектыўна будзе фармавацца гэта альтэрнатыва за мяжой..., тым хутчэй унутры краіны пачне спець разуменне таго, што крах пуцінскага рэжыму - гэта не крах дзяржавы», - падсумаваў апазіцыянер.