У Беларусь прыбыў віцэ-прэм'ер Польшчы

Матэуш Маравецкі абмеркаваў пытанні эканамічнага супрацоўніцтва паміж краінамі.

Пра гэта намеснік старшыні Савета міністраў Польшчы, міністр развіцця і фінансаў Матэуш Маравецкі пагаварыў на сустрэчы з Лукашэнкам, паведамляе БелТА.

На сустрэчы з віцэ-прэм'ерам Польшчы Лукашэнка адзначыў, што Беларусь і Польшча маюць пэўны ўзровень тавараабароту. «У эканоміцы мы не страцілі, як у палітыцы, кантакты. Тым не менш планку гэтую трэба падымаць вельмі высока. Таму што, калі мы разлічваем на больш цесныя стасункі з нашай найбліжэйшай суседкай, нам, вядома ж, трэба ствараць падмурак гэтых стасункаў. І гэтым падмуркам можа быць толькі эканоміка», - заявіў дыктатар.

Разам з тым ён звярнуў увагу, што ў эканамічным супрацоўніцтве ёсць і некаторыя «змрочныя» факты. «Думаю, што падчас пасяджэння сумеснай камісіі вы зможаце разгледзець іх і намеціць шляхі, як іх нівеліраваць, як зблізіць нашы пазіцыі, - сказаў Аляксандр Лукашэнка - Калі мы ў чымсьці не маем рацыі, мы хацелі б, каб і Польшча, і ЕЗ агулам падалі пэўныя жалезабетонныя факты, супраць якіх цяжка будзе выступіць. Я маю на ўвазе антыдэмпінгавы разгляд і гэтак далей». «Вам як прафесіяналу няма сэнсу тлумачыць рознага роду пікіроўкі з двух бакоў у сферы мытных працэдур, узаемнага гандлю. У кожнай дзяржавы заўсёды на любыя санкцыі знойдзецца мера ў адказ. Упэўнены, што нам гэта не трэба», - адзначыў беларускі дыктатар.

«Таму нам агароджу гарадзіць з новых нейкіх перашкод у сферы эканомікі не трэба. Мы гатовыя да таго, каб нармальна развіваліся нашы стасункі з вельмі блізкай для нас краінай», - падкрэсліў Лукашэнка.

«Польшча з’яўляецца памежнай краінай у ЕЗ для выхаду на ўсход, а Беларусь з'яўляецца памежнай краінай для выхаду краін ЕАЭС на захад. Гэты нюанс мы можам таксама сумесна выкарыстоўваць, у тым ліку ў рамках развіцця Шаўковага шляху», - адзначыў польскі віцэ-прэм'ер.

Ён выказаў гатоўнасць абмеркаваць праблемныя пытанні ў развіцці эканамічнага супрацоўніцтва і знайсці неабходныя развязанні. «Ужо сёння да сустрэчы з вамі мы гаварылі пра беларускія трактары і пастаўкі беларускага цэменту ў Польшчу», - сказаў Матэуш Маравецкі.

«Мы вызначана хочам, каб супрацоўніцтва давала карысць абодвум бакам. Нам добра вядомыя цяжкасці трансфармацыі. Мы самі праз гэта прайшлі. І выдатна разумеем, які шлях вам неабходна прайсці і што для гэтага трэба зрабіць», - дадаў ён.