Лукашэнка падрыхтаваў новыя льготы для «мотавелазавода»
32- 24.10.2016, 20:57
- 18,396
Дзяржава зноў ахвочая выдаткаваць грошы падаткаплатнікаў на сумнеўную «мадэрнізацыю».
Старшыня Федэрацыі прафсаюзаў Беларусі Міхаіл Арда праінфармаваў Лукашэнку аб становішчы на ТАА «Мотавелазавод», стане вытворчасці і сітуацыі ў працоўным калектыве. Пра гэта паведамляе прэс-служба Лукашэнкі.
Было адзначана, што завод ні пры якіх абставінах зачыняць нельга, на ім трэба наладзіць паўнавартасную вытворчасць, гаворыцца ў паведамленні.
ТАА «Мотавелазавод» было створанае неўзабаве пасля арышту асноўнага акцыянера ААТ «Мотавела» Аляксандра Мураўёва. Заснавальнікамі новага прадпрыемства выступілі комплекс «Мінск-Арэна» і доследна-механічны завод, галоўным акцыянерам якога з'яўляецца Менгарвыканкам.
Каб забяспечыць выраб прадукцыі, «Мотавелазавод» узяў у арэнду за невялікую плату ў «Мотавела» вытворчыя лініі, якія засталіся ў адным зборачным цэху. Лукашэнка паставіў задачу захаваць брэнды «Аист» і «Мінск».
«Мотавелазавод» распрацаваў бізнэс-план новай вытворчасці. «Далей ён мае прайсці комплексную экспэртызу ў Мінэканомікі і Мінфіне, бо ў праекце ўказу ёсць ільготы», - распавяла tut.by інфармаваная крыніца. Акрамя таго, ідзе пошук крыніц фінансавання.
У гэтым жа годзе менскі мотавелазавод рэалізуе блізу 80 тысяч ровараў, а ў наступным плануе павялічыць гэтую лічбу да 110 тысяч. Аднак пункт бясстратнасці - продаж 250-300 тысяч ровараў за год, тлумачылі інфармаваныя крыніцы. Ва ўладных колах даволі распаўсюджанае меркаванне, што гэтую вытворчасць танней спыніць, раз ужо Беларусь безнадзейна адстала ў вырабе ровараў.
21 кастрычніка суд Фрунзенскага раёна Менска пачаў разглядаць крымінальную справу ў дачыненні да Аляксандра Мураўёва. Прэтэнзіі банкаў да групы кампаній «Мотавела» дасягнулі 73 млн еўраў.