У Рэчыцы людзі штурмуюць банкаўскія і паштовыя аддзяленні

Грамадзяне атрымалі гіганцкія налічэнні за водазабеспячэнне.

Атмасфера - напружаная. Людзі стаяць у чэргах гадзінамі і абураюцца.

«Пачырванелі» ад напружання і рэдакцыйныя тэлефоны. «За ваду налічылі нечуваную суму», «Водаканал не адказвае. Знайдзіце яшчэ хоць які-небудзь нумар, у вас жа ў рэдакцыі ёсць», «Патрабую дырэктара водаканала або райжылкамгаса. Хачу выказаць свае прэтэнзіі асабіста», «Вазьміце фотаапарат і схадзіце на пошту: паглядзіце, як над людзьмі здзекуюцца»- гэта толькі некаторыя з рэплік, лунаюць у атмасферы, піша мясцовая газета «Днепровец».

Адбыліся накладкі: з базы знікла дзесяць тысяч асабовых рахункаў

Карэспандэнт мясцовай раёнкі паспрабаваў разабрацца ў сітуацыі і звярнуўся па каментар да начальніка абаненцкага аддзела водаканала Сяргея Белага.

- Сяргей Аляксандравіч, чаму такія чэргі, гнеўныя званкі? Што адбываецца?

- Праблемы ўзніклі праз пераводу аплаты жыллёва-камунальных паслуг на новую праграму АІС «Разлік-ЖКП». Гэтая праграма распрацавана з улікам выдавання грамадзянам з 1 кастрычніка гэтага года безнаяўных жыллёвых субсідый. Фактычна, адбылося аб'яднанне двух баз: водаканала і ЖКГ. Калі раней у кожнага пастаўшчыка паслуг быў свой асабовы рахунак, то цяпер ён адзін. Пры аб'яднанні баз - гэтым па ўсёй рэспубліцы займаецца менская арганізацыя ЗАТ «СОФТКЛУБ» - адбыліся накладкі.

Да прыкладу, з 44 тысяч асабовых рахункаў «Рэчыцаводаканала» засталося толькі 34 тысячы. Дзесяць тысяч асабовых рахункаў з незразумелых прычынаў зніклі. Як гэта адбылося, ніхто не тлумачыць. У выніку сітуацыя наступная: асабовыя рахункі шэрагу грамадзян адсутнічаюць у базе наогул. Гэта значыць няма ні прозвішча абанента, ні яго адраса - няма нічога.

Альбо ў грамадзян зніклі паказанні вадамераў. Іншымі словамі, абанент у базе ёсць, зроблены налічэнні за квартплату, вываз смецця, а паказанні лічыльнікаў за ваду адсутнічаюць. Новая праграма прадугледжвае такі нюанс: у выпадку адсутнасці паказанняў аўтаматычна разлічваецца кошт паслугі па колькасці зарэгістраваных грамадзян паводле нормаў і тарыфаў, што забяспечваюць поўную аплату выдаткаў на аказанне паслугі. Гэта значыць па сабекошце. Такім чынам грамадзяне атрымалі рахункі з вялізнымі сумамі за ваду і каналізацыю: па 400-500 тысяч недэнамінаваных рублёў.

Гэтыя налічэнні няслушныя. Будзе рабіцца пераразлік. Мы на сувязі з Менскам. Але пакуль там адказваюць: чакайце, вы ў чарзе, працуем. На абслугоўванні кампаніі ўся рэспубліка. Відавочна, Рэчыца - толькі кропля ў моры.

Знайдзіце час - звярніцеся ў водаканал

- Што адбываецца цяпер: мы прымаем грамадзян і праводзім прыём звестак уручную. У прамым сэнсе слова - ручкай на лістах запісваем бягучыя паказанні вадамераў. Затым гэтая інфармацыя будзе перадавацца ў Менск.

У сувязі з гэткай сітуацыяй, сумесна з райжылкамгасам прынятая пастанова не спаганяць пеню за несвоечасовую - пасля 25 кастрычніка - аплату за ваду і квартплату.

Грамадзянам хвалявацца не варта. Але калі вы ўбачылі незразумелыя лічбы ў квітанцыях за ваду, трэба знайсці час, каб патэлефанаваць ці прыйсці ў водаканал.

У праграме мы нават не бачым, якія дзесяць тысяч абанентаў згубіліся. Толькі пры звароце грамадзян бачныя няслушныя налічэнні.

Пеня налічацца не будзе

- Дапусцiм, грамадзяне паведамілі водаканалу паказанні, якія адпавядаюць запісы зрабілі. Што далей?

- На пошце або ў банку можна аплаціць толькі квартплату адной сумай. Без паслугі за водазабеспячэнне. Але грамадзяне кажуць, што не ўсюды такія плацяжы прымаюць. Таму зноў жа - не хвалюйцеся. Проста на наступны месяц пяройдзе пазыка - з улікам пераразліку, пеня на які налічвацца не будзе.

Больш за ўсё абанентаў - каля пяці тысяч - «страцілася» з КІЗаўскіх дамоў і ЖБВК. Таму звяртаюся да іх старшыняў: каб не ганяць людзей, можна цэнтралізавана сабраць паказанні вадамераў у кватэрах дамоў. Для гэтага ад рукі дастаткова скласці ведамасць з указаннем адраса дома, даты зняцця паказанняў, нумароў кватэр і непасрэдна саміх паказанняў.

- Людзі б'юць трывогу: датэлефанавацца да водаканала немагчыма. Што тут скажаце?

- Сапраўды, водаканал працуе ў асаблівым рэжыме. У нас пастаянная чарга: дзесяць тысяч «зніклых» з базы абанентаў не жарт. Пракансультаваць праз тэлефон часам проста фізічна няма калі. Прыносім свае прабачэнні.

Цяпер грамадзянаў прымаюць адначасова 14 чалавек. Гэта спецыялісты абаненцкага аддзела і іншых падраздзяленняў. Існуе распараджэнне дырэктара водаканала: па любым нумары, куды датэлефанаваліся грамадзяне, інфармацыя павінна прымацца.

- Ёсць пытанні па аплаце паслуг праз інтэрнэт-банкінг. Далёка не ўсе разабраліся з новаўвядзеннямі.

- Растлумачу: банкі і пошту павінны былі паведаміць аб аб'яднанні баз водаканала і райжылкамгаса. Але гэтага не адбылося. Таму тым, хто аплачвае паслугі з дапамогай інтэрнэту праз АРІП, трэба ведаць, што аплата за ваду і камунальныя паслугі цяпер праводзіцца адным плацяжом. На сваёй старонцы неабходна знайсці меню «Камунальныя плацяжы» і зноўку ўвесці свой асабовы рахунак. Ён ёсць у квітанцыях за кватэру. Але зноў жа - спраўджвайце паказанні лічыльнікаў за ваду. Калі нешта не так, паведамляйце нам.

Водаканал прыкладае ўсе намаганні для таго, каб як мага хутчэй давесці інфармацыю да «СОФТКЛУБ». Наш праграміст пастаянна на сувязі з імі. Цяжкасці часовыя. Вельмі спадзяемся на разуменне грамадзян.