Лукашэнка так і не заплаціў за газ

Разбірацца з сітуацыяй прыехаў прэм'ер-міністр РФ.

Беларусь дагэтуль не пералічыла Расеі грошы за пастаўкі газу.

Пра гэта ўчора заявіў віцэ-прэм'ер Расеі Аркадзь Дварковіч. Пералічэнне Беларуссю даплаты за расейскі газ спалучанае з падпісаннем шэрагу пагадненняў, якія павінны прайсці праз урады дзвюх краін. Віцэ-прэм'ер дадаў, што, пакуль дамовы не будуць падпісаны, беларускі бок не пералічыць грошы за газ.

«Гэта спалучаныя пытанні», - падкрэсліў віцэ-прэм'ер, адзначыўшы, што ў чацвер старшыня ўрада РФ Дзмітрый Мядзведзеў будзе знаходзіцца з візітам у Беларусі і, як чакаецца, там будуць атрыманы адказы, у тым ліку, і на пытанне аб сродках за расейскі газ.

Дзмітрый Мядзведзеў возьме ўдзел у пасяджэнні Еўразійскага міжурадавага савета, на якім плануецца абмеркаваць праект новага Мытнага кодэкса, а таксама ўхваліць праект бюджэту Еўразійскага эканамічнага саюза на наступны год. Размова пойдзе і аб распрацоўцы механізму кантролю за перамяшчэннем тавараў па тэрыторыі ЕўрАзЭС.

Раней беларускія чыноўнікі неаднаразова заяўлялі, што газавы канфлікт з Расеяй вычарпаны, аднак, як высветлілася, грошы за расейскі газ так і не былі заплачаныя.

Яшчэ 11 кастрычніка міністр энэргетыкі Беларусі Уладзімір Патупчык заявіў журналістам, што краіна да 20 кастрычніка выплаціць недаплачаны за расейскі газ 281 млн даляраў.

19 кастрычніка старшыня праўлення Нацбанка Беларусі Павел Калавур заявіў журналістам, што Беларусь без праблем заплаціць за расейскі газ.

10 кастрычніка віцэ-прэм'ер Уладзімір Сямашка пасля дакладу Аляксандру Лукашэнку заявіў пра дасягнутыя дамоўленасці з Расеяй у сферы паставак энэрганосьбітаў. Але пры гэтым Сямашка паведаміў, што вярнуць грошы за газ неабходна да 25 кастрычніка. «Але я буду звяртацца да сваіх расейскіх калег, каб гэта было зроблена трохі ў растэрміноўку. Можа быць, да канца гэтага года», - сказаў віцэ-прэм'ер.