Як працаўладкоўваюць былых «палатачнікаў»?

Былыя «дэпутаты» паводле звычкі аддаюць перавагу непыльным пасадам.

Віктар Гумінскі прызначаны першым намеснікам старшыні выканкама СНД. Праца не пыльная - самі разумееце, які цяпер попыт з Садружнасці незалежных дзяржаў і яго выканаўчых органаў, а статус дыпламатычны, піша belaruspartisan.org.

Нагадаем, што перад завяршэннем працы «палаты прадстаўнікоў» мінулага склікання Лукашэнка правёў адмысловую сустрэчу са старшынём ніжняй «палаты» «парламента» Уладзімірам Андрэйчанкам, прысвечаную менавіта працаўладкаванню былых «дэпутатаў». Усім працу ён не абяцаў, але заявіў: «Паглядзіце, каб дэпутаты, што сыходзяць з парламента, былі запатрабаваныя ў жыцці. Ёсць дэпутаты, якіх мы страціць не можам».

Віктар Гумінскі - адзін са стваральнікаў пралукашэнкаўскай «Белай Русі», трэба разумець, менавіта такім і з'яўляецца. Акрамя яго, працу ўжо атрымаў Алег Вялічка - ён стаў намеснікам старшыні Берасцейскага аблвыканкама.