Мінабароны адказала на заяву Украіны аб самалётах РФ над Беларуссю
11- 28.10.2016, 21:27
- 15,280
У Міністэрстве абароны Беларусі заявілі, што «гэта была трэніроўка СПА СНД».
Украінская выведка сёння заявіла, што расейская авіяцыя адпрацоўвала ў паветранай прасторы Беларусі нанясенне авіяўдараў па аб'ектах Украіны.
У Мінабароны Беларусі здзівіліся заяве ўкраінскіх калег і нагадалі аб правядзенні маштабных вучэнняў сістэмы СПА СНД, аб якіх паведамлялася загадзя.
«Кіраўніцтва РФ не адмаўляецца ад сваіх агрэсіўных планаў у дачыненні да Украіны і прадаўжае падрыхтоўку да магчымых шырокамаштабных наступальных дзеянняў супраць нашай дзяржавы. 26 кастрычніка, выкарыстоўваючы абавязкі Рэспублікі Беларусь у рамках саюзніцкага дзяржавы, расейскімі баявымі самалётамі ў паветранай прасторы Беларусі адпрацаванае пытанне ўмоўнага нанясення масаваных авіяцыйных удараў па стратэгічных аб'ектах на тэрыторыі Украіны», - заявіў 28 кастрычніка прадстаўнік галоўнай управы выведкі Міністэрства абароны Украіны Вадзім Скібіцкі, паведамляюць украінскія СМІ.
Паводле ягоных слоў, былі заўважаныя самалёты А-50У, Тую-160, Ту-22М3 і Су-34, якія выконвалі палёты ўздоўж дзяржаўнай мяжы Украіны і ўмоўна выконвалі пуск ракет, паведамляе tut.by.
У беларускім абаронным міністэрстве здзівіліся рэакцыі ўкраінскіх калег і нагадалі, што раней папярэджвалі аб правядзенні маштабных вучэнняў сістэмы СПА СНД. 26 кастрычніка прайшла трэніроўка з удзелам дзяжурных сіл у СПА Арменіі, Беларусі, Казахстана, Кыргызстана, Расеі, Таджыкістана і Узбекістана.
Манеўры праходзяць у паветранай прасторы Расеі, Беларусі, Казахстана і Арменіі. Адпрацоўваюцца дзеянні дзяжурных сіл СПА супраць паветраных суднаў, якія парушаюць межы краін СНД, у выпадку згону паветраных суднаў, пры наданні дапамогі экіпажам самалётаў і верталётаў, якія церпяць бедства.
У трэніроўцы задзейнічана блізу 100 самалётаў знішчальнай авіяцыі Су-27, Міг-29, МіГ-31, бамбавальнай авіяцыі Су-24, Су-34, штурмавой авіяцыі Су-25, далёкай авіяцыі Ту-22, Ту-160, Ту-95, верталёты Ка-27, Мі-8 Узброеных сіл Арменіі, Беларусі, Казахстана, Кыргызстана, Расеі, Таджыкістана і Узбекістана, а таксама падраздзяленні радыётэхнічных войскаў і зенітных ракетных войскаў.
Нагадаем, што ў верасні Чарнаморскім рэгіёне РФ прайшлі маштабныя вайсковыя вучэнні Каўказ-2016, у рамках якіх адпрацоўваліся варыянты магчымага вайсковага канфлікту РФ з NATO.