Менскі «дэпутат»-камуніст набраў у людзей грошай і знік
37- 1.12.2016, 17:25
- 24,362
Акрамя «дэпутацтва» Петрамовіч Мікалай таксама працаваў намеснікам кіраўніка ў ідэалогіі Партызанскага раёну.
А яшчэ быў дэпутатам Менгарсавета, прычым не абы якім - партыйным, ад праўладных камуністаў.
Але прыкладна з месяц таму Петрамовіч Мікалай знік адусюль. На сайце адміністрацыі Партызанскага раёна ягонае фота і прозвішча ўжо прыбралі.
Кажуць, што чыноўнік-«дэпутат» набраў грошай і збег з краіны.
«Мы яго шукаем, бо ён вінны нам грошы. Суму агучваць не хачу. Дзе ён - невядома, нават ягоная жонка гэтага не ведае. Ён не ў Беларусі, думаю», - распавяла nn.by Таццяна Якушава з Віцебска.
Жанчына шукае Петрамовіча праз сацыяльныя сеткі. Але ні яна, ні яе муж аб падрабязнасцях сваіх дачыненняў з камуністам-«дэпутатам» казаць не хочуць.
«Я толькі скажу, што на яго ўжо напісалі заяву ў Менску - і пацярпелых там не адзін і не два чалавекі. Ён таксама ім вінны грошы», - паведаміў Васіль, муж Таццяны.
У адміністрацыі Партызанскага раёна паведамілі, што з 24 кастрычніка Петрамовіч у іх больш не працуе. Чаму раптам ён пакінуў пасаду, тлумачыць адмовіліся.
«Гэтая інфармацыя не для прэсы», - паведамілі ў адміністрацыі раёна.
У Камуністычнай партыі Беларусі, ад якой балатаваўся Петрамовіч, сцвярджаюць, што не ведаюць, што з членам партыі. Запэўніваюць, не маюць ніякіх кантактаў свайго аднапартыйца.
Але міліцыя ўжо зацікавілася гэтай гісторыяй. У прэс-службе ГУУС Менгарвыканкама паведамілі, што ў дачыненні да Петрамовіча праводзіцца праверка.
Петрамовіч Мікалай нарадзіўся ў 1978 годзе ў вёсцы Жыровічы Слонімскага раёна Гарадзенскай вобласці. Вучыўся на следча-экспэртным факультэце Акадэміі МУС Беларусі, у новым Маскоўскім юрыдычным інстытуце. Скончыў Інстытут дзяржаўнай службы Акадэміі кіравання.
Раней Петрамовіч працаваў начальнікам управы кадраў і тэхнічнага навучання на менскім «Інтэграле», ачольваў там арганізацыю БРСМ.