Расею хочуць выключыць з Міжнароднага алімпійскага камітэта

Кіраўнік амерыканскага антыдопінгавага агенцтва заклікаў выключыць Расею з МАК.

Кіраўнік амерыканскага антыдопінгавага агенцтва (USADA) Трэвіс Тайгарт заклікаў Міжнародны алімпійскі камітэт (МАК) часова выключыць Алімпійскі камітэт Расеі (ОКР) са свайго складу за стварэнне дзяржаўнай сістэмы прымянення допінгу. Пра гэта паведамляецца на сайце USADA.

На думку Тайгарта, у другой частцы даклада кіраўніка незалежнай камісіі Сусветнага антыдопінгавага агенцтва (WADA) Рычарда Макларэна было паказана, як алімпійскі рух стаў карумпаваным.

«МАК павінен умяшацца. Сумленныя спартоўцы не будуць задаволеныя, пакуль WADA не будзе зацверджанае ў якасці міжнароднага незалежнага рэгулятара, а Алімпійскі камітэт Расеі не будзе выключаны са складу МАК да выпраўлення ўсіх парушэнняў. Таксама трэба забараніць правядзенне ўсіх спартыўных спаборніцтваў на тэрыторыі Расеі», – заявіў Тайгарт.

10 снежня віцэ-прэм'ер Расеі Віталь Мутко заявіў, што ні ў адным відзе праграмы на Алімпійскіх гульнях 2014 года ў Сочы расейцам не патрабаваўся допінг. Ён адзначыў, што дзяржава ніколі не падтрымлівала і не прыхоўвала прымяненне спартоўцамі забароненых прэпаратаў.

Другая частка даклада незалежнай камісіі WADA наконт праблемаў допінгу ў расейскім спорце была прапанаваная 9 снежня. Сярод іншага, у ім паведамляецца, што фальсіфікацыі з допінг-спробамі выяўленыя ў двух расейцаў, якія заваявалі чатыры залатыя медалі Алімпіяды 2014 года ў Сочы. Акрамя таго, супрацоўнікаў Маскоўскай антыдопінгавай лабараторыі абвінавацілі ва ўтойванні станоўчых спробаў з дапамогай дадавання ў іх солі і кавы.