Ірына Герашчанка: Еўразвяз здзяйсняе гістарычную памылку
18- 3.12.2016, 11:36
- 7,663
Сітуацыю з адсутнасцю бязвізу для Украіны цяжка растлумачыць украінскаму грамадству.
Віцэ-спікер Вярхоўнай Рады Украіны Ірына Герашчанка мяркуе, што калі Эўразвяз будзе марудзіць з вылучэннем бязвізавага рэжыму для Украіны, гэта стане гістарычнай памылкай, бо гэта можа прывесці да страты даверу ўкраінскага грамадства.
У каментары УНІАН Герашчанка падкрэсліла, што сітуацыю, якая склалася, "цяжка растлумачыць ўкраінскаму грамадству".
Пры гэтым яна адзначыла, што "цяпер мяч на баку Брусэля".
"Мы з павагай ставімся да еўрапейскага боку, калі яны кажуць, што мы павінны выканаць нашу частку абавязальніцтваў. Але і мы кажам, што нашыя партнёры гэтаксама павінны выконваць свае абавязальніцтвы. Украіне ўсё не проста даецца, але, магчыма, у гэтых выпрабаваннях мы загартоўваемся як краіна і набываем права голасу. Гэта дарагога каштуе", – сказала Герашчанка.
24 лістапада адбыўся саміт Украіна – ЕЗ, на якім пытанне вылучэння бязвізу Украіне, насуперак чаканням Кіева, не разглядалася.
У той самы дзень кіраўнік Еўракамісіі Жан-Клод Юнкер заявіў, што Украіна атрымае бязвізавы рэжым у найбліжэйшыя тыдні.
Старшыня Еўрапарламента Марцін Шульц заявіў, што працэс візавай лібералізацыі для Украіны немагчыма паскорыць праз тое, што Францыя, Бэльгія, Італія і Нямеччына не могуць узгадніць механізм ягонага прыпынення.
Еўракамісар Ёханэс Хан заявіў, што ў ЕЗ будуць сур'ёзныя праблемы праз страту даверу, калі Брусэль не выканае свае абавязальніцтвы перад Украінай.
У сваю чаргу, еўрадэпутат ад Польшчы Яцэк Сарыюш-Вольскі заявіў, што прамаруджанне з вылучэннем бязвізавага рэжыму Украіне і Грузіі з'яўляецца дэманстрацыяй невыразнай вонкавай палітыкі ЕЗ.
Згодна з прагнозам Еўрапарламента, разгляд механізму прыпынення бязвізу можа адбыцца 18 студзеня 2017 года.