У Століне збітаму міліцыянтам 9-гадоваму школьніку стала дрэнна пасля допыту

Улада Палхоўскага без ведама ягоных бацькоў дапытаў інспектар ІСН Столінскага раёна.

9-гадовага Улада Палхоўскага 12 ліпеня 2016 года ў Століне збіў старшы інспектар аховы правапарадку і прафілактыкі Столінскага РАУС Вадзім Прылуцкі. Мясцовае РАУС справу замяла, аднак Святлана Палхоўская, маці хлопчыка, спрабуе дамагчыся праўды. Цяпер Следчы камітэт вядзе праверку паводле яе заявы.

Днямі 9-гадовага хлопчыка дапытаў інспектар у справах непаўналетніх Собаль у прысутнасці жонкі... міліцыянта Вадзіма Прылуцкага. Хоць маці Улада Палхоўскага нават не ведала аб допыце, а сацыяльны педагог, як таго патрабуе закон, адсутнічаў.

- Сёння паміж 11 і 12 гадзінамі дня, падчас школьнага перапынку, тэлефануе мой сын: мама, мяне дапытваў Собаль – інспектар ІСН, які курыруе нашу школу. «Чаму дапытваў?» «Не ведаю. Мы знаходзіліся ў кабінеце завуча. Яшчэ інспектар ІСН апытваў Літвінка Мікіту і Дзіму Астроўскага. Ніхто не патлумачыў, на якой падставе праводзіцца допыт.

Мяне не паведамілі, што сёння ў школе будуць дапытваць дзіця. На якой падставе інспектар ІСН без мяне дапытваў непаўнагадовае дзіцяці? Сын перанёс траўму. Але самае дзіўнае ў іншым: пры апытанні прысутнічала жонка міліцыянта, на якога я напісала заяву. Як гэта называецца? – абураецца Святлана Палхоўская.

Пасля допыту Улад Палхоўскі перанёс нервовы зрыў:

- У дзіцяці адбыўся нервовы зрыў. Я папрасіла медсястру агледзець дзіця (дарога ў школу ў мяне заняла б блізу гадзіны), бо яму дрэнна. Медсястра патлумачыла: дзіця вельмі расхвалявалася, яна дала яму заспакаяльныя кроплі. Мая мама забрала дзіця са школы і звадзіла на прыём у паліклініку.

Мяне паставілі перад фактам: пасля допыту ў Собаля сын паскардзіўся на дрэннае самаадчуванне. Патэлефанавала маме Мікіты Літвінка: ты ў курсе, што тваё дзіця дапытвае інспектар ІСН? Яна здранцвела. Тэлефаную следчаму, які праводзіць праверку: сцвярджае, што ніякіх распараджэнняў у рамках праверкі паводле заявы не атрымліваў і не аддаваў. І следчы не ў курсе, на якой падставе праводзіўся допыт дзяцей, — распавяла «Беларускай праўдзе» Святлана Палхоўская.

Дзікая гісторыя ў Століне пачалася яшчэ летам. 12 ліпеня старшы інспектар аховы правапарадку і прафілактыкі Столінскага РАУС Вадзім Прылуцкі збіў 9-гадовага Улада Палхоўскага. Малады ды ініцыятыўны міліцыянт, як яго характарызуе «раёнка», у дзень свайго 36-годдзя – 12 ліпеня збіў свайго 9-гадовага суседа.

Амаль два месяцы РАУС не займалася справай аб збіцці, а ў выніку – разгляд справы спынілі.

Вадзіма Прылуцкага не адхілялі ад службы нават падчас службовай праверкі, якую праводзіў ягоны падначалены. А збітага хлопчыка паставілі на ўлік у справах непаўнагадовых.

Святлана Палхоўская накіравала ў пракуратуру заяву аб збіцці свайго сына. Цяпер праверкай займаецца Следчы камітэт, які не даваў указанняў РАУС апытваць хлопчыка.