У Літве за хабар памежніку затрымалі беларуса
3- 5.12.2016, 14:43
- 29,734
Мужчыне пагражае штраф, абмежаванне волі або арышт.
Літоўскія памежнікі ў кантрольна-прапускным пункце "Мядзінінкай" затрымалі грамадзяніна Беларусі, які за нядзейныя нумары паўпрычэпа цягача спрабаваў пазбегнуць адказнасці з дапамогай хабару ў 20 еўраў, піша belaruspartisan.org.
У нядзелю памежнікі правяралі асабістыя дакументы 43-гадовага беларуса, які ехаў з Літвы ў Беларусь, а таксама дакументы на ягоны грузавы аўтамабіль DAF з паўпрычэпам.
Цягач 2004 года выпуску быў з беларускімі рэгістрацыйнымі нумарамі, паўпрычэпы - з часовымі літоўскімі. Было выяўлена, што часовыя нумары паўпрычэпа ўжо 10 месяцаў не дзейнічаюць.
Кіроўца цягача прызнаўся, што ведаў пра гэта, і што яму пагражае адміністрацыйная адказнасць, і прапанаваў памежнікам дамовіцца, уклаўшы купюру вартасцю 20 еўраў у дакументы на аўтамабіль.
Беларуса папярэдзілі пра крымінальную адказнасць за подкуп супрацоўніка САДМ, аднак кіроўца ўсё адно прапаноўваў хабар, сцвярджаючы, што грошы вылучаныя на тое, каб ён мог хутчэй пакінуць краіну.
У выніку памежнікі затрымалі кіроўцу, у дачыненні да яго распачатае дасудовае расследаванне. За такое парушэнне мужчыне пагражае штраф, абмежаванне волі або арышт. Цягач з паўпрычэпам знаходзіцца на тэрыторыі САДМ.