Лукашэнка баіцца ехаць на «Камволь»?

Дыктатару няма чаго сказаць падманутым працоўным.

Год таму Лукашэнка анансаваў, што наведае гэта прадпрыемства, прычым нечакана. Што адбылося з «Камволем» за апошні час, піша «Салідарнасць».

Ён уратуе яго!

Заснаванае яшчэ ў 1955 годзе прадпрыемства перажывала ў сваёй гісторыі ўзлёты і падзенні, але апошнія гады існавання ААТ «Камволь», дзе занятыя больш за 800 чалавек, выявіліся, бадай, самымі супярэчлівымі.

У 2012 годзе Лукашэнка наважыў асабіста выратаваць найбуйнейшага вытворцу тэкстыльнай прадукцыі, які папаў у глыбокі крызіс. Тэхналагічная адсталасць вытворчасці і не толькі сталі прычынай працы ў страту.

Падчас візіту на прадпрыемства дыктатар зладзіў адзін са сваіх самых гучных разносаў апошніх гадоў. Ён публічна «жахнуўся» ўбачанаму («Гэта проста злачынная безадказнасць») і звольніў старшыню канцэрна «Беллегпрам» Генадзя Вырко і гендырэктара ААТ «Камволь» Святлану Стрыжак. Акрамя таго, было зробленае «апошняе» папярэджанне ўраду (Міхаілу Мясніковічу і Уладзіміру Сямашку).

Работнікам Лукашэнка паабяцаў: «Прадпрыемства мы зробім, я вам абяцаю, да наступнай зімы».

Важная дэталь: са слоў самога дыктатара «Камволь» хацелі ўзяць пад крыло замежныя кампаніі. Напрыклад, турэцкая «Дэ Тэкстыль» гатовая была ўкласці ў праект блізу 200 млн даляраў. Аднак улады наважылі прадпрыемства нікому не аддаваць і рызыкнуць грашыма беларусаў.

У лістападзе 2013, праз год пасля дадзенага работнікам абяцання, Лукашэнка падпісаў указ аб рэалізацыі інвестпраекта для стварэння новай вытворчасці на «Камволі». Дакумент абавязваў «Беларусбанк» выдаць для гэтай мэты крэдыт на 55,8 млн еўра, а Саўмін - кампенсаваць адсоткі ўзамен на павелічэнне дзярждолі ў статутным фондзе ААТ. Акрамя таго, указ прадпісваў вылучыць прадпрыемству з інавацыйнага фонду на беззваротнай аснове Br490 млрд - для фінансавання будаўніча-мантажных работ.

Курсам на той момант гэтая сума складала блізу 50 млн даляраў.

Гэта значыць, агулам «Камволю» наважылі выдаць на мадэрнізацыю блізу 100 млн у.а.

Але нешта пайшло не так...

Спачатку Лукашэнка «гарэў жаданнем» убачыць наступствы сваёй пастановы. Улетку 2015 года паведамлялася аб яго намеры двойчы «ў найбліжэйшы час» наведаць «Камволь», каб асабіста пракантраляваць, як скончыцца «мадэрнізацыя».

Гэтага так і не адбылося, а ў снежні дыктатар заявіў: «Не паехаў, бо міністр пачаў займацца там ашуканствам». Мелася на ўвазе, што да яго прыезду рыхтуецца паказуха.

Аднак дыктатар зноў паабяцаў, што яшчэ наведае ААТ «Камволь» - прычым, нечакана.

Месяц таму, 8 лістапада, намеснік старшыні канцэрна «Беллегпрам» Мікалай Рагожнік абвясціў, што «Камволь» скончыў мадэрнізацыю. Ацаніць яе Лукашэнка пакуль не спяшаецца, у той час як з моманту ягонага апошняга абяцання наведаць прадпрыемства прайшоў ужо год.

Не бярэ ён і іншага важнага ўдзелу ў лёсе прадпрыемства. У канцэрне «Беллегпрам» ужо даўно чакаюць пастановы Лукашэнкі на прапанову аб аб'яднанні прадпрыемства з ААТ «Сукно».

Чаму дыктатар мог страціць цікавасць да свайго праекту? На гэта ёсць некалькі прычын.

Па-першае, нягледзячы на ўсе намаганні ўладаў, вытворца тканін прадаўжае прыносіць адны страты. Па-другое, новае абсталяванне хоць і паставілі, але кіраўнікі, відавочна, не ведаюць, што рабіць далей і як атрымаць прыбытак. Пра гэта сведчыць нядаўняя заява Уладзіміра Сямашкі, згодна з якой на «Камволь» хочуць запрасіць турэцкіх тэхнолагаў.

Анансуецца, што прадпрыемства пачне выходзіць на поўную магутнасць у 2017 годзе. Але не трэба быць аракулам, каб прадказаць, што ўбуханыя дзяржавай у «Камволь» сродкі не акупяцца. Яшчэ свежыя таксама ў памяці і папярэднія няўдалыя прыклады інвестыцый.

Наведаўшы «Камволь», кіраўнікі краіны могуць убачыць прадпрыемства, якое магло б атрымаць новае жыццё пад шэфствам прафесійных інвестараў, але замест гэтага пад іх патранажам яно прадаўжае смактаць грошы з бюджэту.