Пры сутыкненні аўтамабіляў у Менску дзіця вылецела праз шкло
19- 6.12.2016, 11:56
- 17,645
Паўтарагадовая дзяўчынка знаходзілася не ў спецыяльным аўтакрэсле, а на руках у мамы.
Сутыкненне двух аўтамабіляў адбылося на скрыжаванні прасп. Ракасоўскага і вул. Пляханава - сярод пацярпелых пасажыраў паўтарагадовае дзіця.
- ДТЗ здарылася ўначы 5 снежня. Кіроўца Mitsubishi Colt выехаў на скрыжаванне прасп. Ракасоўскага і вул. Пляханава на чырвоны сігнал святлафора, не саступіў дарогу і сутыкнуўся з Renault Megane. Паводле папярэдняй інфармацыі, ад моцнага ўдару праз задняе бакавое шкло аўтамабіля Mitsubishi Colt вылецела дзяўчынка 2015 года нараджэння, якую маці трымала на руках. Дзіця дастаўленае ў шпіталь са страсеннем мозгу, - паведамляе БелТА словы Сяргея Зараніка, начальніка аддзела агітацыі і прапаганды УДАІ ГУУС Менгарвыканкама.
Супрацоўнік адзначыў, што ў Беларусі ў лістападзе праходзіла шырокамаштабная тлумачальная кампанія сярод удзельнікаў дарожнага руху прафілактыкі ДТЗ з удзелам дзяцей-пасажыраў.
- На жаль, не ўсе кіроўцы пачулі парады і рэкамендацыі ДАІ, - сказаў Заранік.