Аланд прызначыў новага прэм'ер-міністра Францыі

Былы прэм'ер Мануэль Вальс падаў у адстаўку, каб засяродзіцца на прэзідэнцкай кампаніі.

Франсуа Аланд прызначыў новым прэм'ер-міністрам Францыі Бернара Казнева, які дагэтуль узначальваў міністэрства ўнутраных спраў краіны, паведамляе РБК са спасылкай на афіцыйную заяву Елісейскага палаца.

«Мануэль Вальс падаў прашэнне аб адстаўцы ўрада прэзідэнту рэспублікі, які гэтую адстаўку прыняў. Прэзідэнт прызначыў спадара Бернара Казнева прэм'ерам і папрасіў яго сфармаваць новы ўрад», — гаворыцца ў заяве Елісейскага палаца.

Мануэль Вальс, які раней займаў пасаду прэм'ера, у аўторак падаў у адстаўку, каб засяродзіцца на прэзідэнцкай выбарчай кампаніі.

У панядзелак Вальс афіцыйна вылучыў сваю кандыдатуру для ўдзелу ў прэзідэнцкіх унутраных выбарах Сацыялістычнай партыі.

Казнеў апошнія два гады ўзначальваў міністэрства ўнутраных спраў Францыі. У гэты перыяд у Францыі здарыліся два буйныя тэракты - у Парыжы і Ніцы, якія забралі жыцці больш за 230 чалавек.

Вальс, Казнеў і цяперашні прэзідэнт Францыі Франсуа Аланд з'яўляюцца прадстаўнікамі Сацыялістычнай партыі.

Аланд 2 снежня заявіў, што не будзе балатавацца на другі прэзідэнцкі тэрмін праз свой нізкі рэйтынг. Гэта першы выпадак за доўгі перыяд у гісторыі Францыі, калі дзейны прэзідэнт адмаўляецца ад перспектывы падоўжыць паўнамоцтвы.

Як перадаюць карэспандэнты, праз нізкі рэйтынг Аланда ў любога кандыдата ад Сацыялістычнай партыі будуць слабыя шанцы на перамогу і нават на выхад у другі тур.

Асноўнымі кандыдатамі на прэзідэнцкіх выбарах у Францыі, якія пройдуць вясной 2017 года, з'яўляюцца кансерватар Франсуа Фіён, які быў прэм'ер-міністрам пры прэзідэнце Нікаля Сарказі, і лідар ультраправага «Нацыянальнага фронту» Марын Ле Пен.

Апытанні паказваюць, што ў Фіёна ёсць перавага над Ле Пен. Пакуль яго шанцы на перамогу ў другім туры вышэйшыя.