У Польшчы затрымалі рэкордную кантрабанду цыгарэт з Беларусі

«Тавар» на суму $2,25 мільёнаў везлі ў газавых цыстэрнах.

Амаль 718 тысяч пачкаў кантрабандных цыгарэт канфіскавалі прадстаўнікі Падляскай памежнай службы. Кантрабанда на суму больш за 9,5 млн злотых была схаваная ў цыстэрнах, якія выкарыстоўваюцца для транспарціроўкі газу. У сувязі з гэтай справай былі арыштаваныя пяць польскіх грамадзян, паведамляе «Белсат».

Работнікі Памежнай службы наважылі старанна праверыць грузавы цягнік, які прыбыў з Беларусі на польскую перагрузачную станцыю. Праверка паказала, што ўнутры трох рэзервуараў для газу могуць быць схаваныя кантрабандныя цыгарэты.

Мытнікі, якім перадалі ёмістасці, адсканавалі іх адмысловай прыладай. Звесткі на маніторах пацвердзілі падазрэнні, што замест заяўленага ў дакументах газу ў цыстэрнах была тытунёвая кантрабанда. Каб схаваць цыгарэты, рэзервуары былі запоўненыя мяшкамі з цэментам і невялікімі газавымі балонамі.

Кошт выяўленых кантрабандных цыгарэт складае больш за 9,5 млн злотых (блізу $2,25 млн). Страты польскага бюджэту ў сувязі з нявыплачанай акцызамі маглі б скласці больш за 15 млн злотых (блізу $3,5 млн).

У сувязі з гэтай справай былі арыштаваныя пяць польскіх грамадзян. Двое мужчын (ва ўзросце 37 і 42 гадоў), якія падазраюцца ў арганізацыі гэтай кантрабанднай пастаўкі, узятыя пад варту. Польскія праваахоўнікі не выключаюць новых затрыманняў у гэтай справе.