Румас распавёў пра прычыны расстання з Хацкевічам

Са слоў кіраўніка АБФФ, Хацкевіч быў звольнены ў сувязі з адмоўным вынікам каманды Беларусі.

Кіраўнік АБФФ Сяргей Румас распавёў «Прессболу» аб прычынах расстання з Аляксандрам Хацкевічам, які ўзначальваў нацыянальную каманду Беларусі са снежня 2014 года.

— Беларуская федэрацыя футбола скасавала кантракт з галоўным трэнерам каманды ў аднабаковым парадку. Аляксандру Мікалаевічу ўжо пра гэта паведамлена.

— Нечакана. Вядома, што пасля матча ў Балгарыі вы сустракаліся з Хацкевічам — вынікам стала інфармацыя аб працягу супрацоўніцтва. Што памянялася за гэтыя тыдні?

— На той лістападаўскай сустрэчы, улічваючы кепскі старт кваліфікацыі, мы прапанавалі Хацкевічу ўмовы далейшай працы. Паколькі паводле якасці гульні і выніку каманда не прасуналася наперад, то фінансавую частку кантракту трэнера было пастаноўлена скарэктаваць у бок змяншэння. Аляксандр Мікалаевіч прыняў гэта да ведама і ўзяў час на роздум. А днямі мы зноў сустрэліся і вярнуліся да нашай размовы. Хацкевіч паведаміў, што ўсё абдумаў і ўмовы федэрацыі прыняць не можа. Таму кантракт скасаваны.

— Скарачэнне заплаты па выніках восеньскага кваліфікацыйнага этапу цыклу — гэта рэакцыя выключна на якасць гульні і адмоўны вынік?

— Так. Што да гульні, то, на наш погляд, не было паслядоўнасці як у кадравым пытанні, так і ў тактычным. Дэкларавалася схема 4-3-3, потым яна стала змяняцца. У дачыненні да падбору футбалістаў таксама адсутнічаў сістэмны падыход. Зрэшты, глыбока ў футбольныя пытанні занурацца не хачу. А пра вынік у нас была выразная дамоўленасць. Перад стартам кваліфікацыі сустракаліся з Хацкевічам — з мэтай пазначыць арыенціры на восеньскі перыяд. Аляксандр Мікалаевіч акрэсліў іх сам: сем балаў і месца не ніжэй за трэцяе. На жаль, задача не выкананая.