Менчукам стане лягчэй дабірацца да аэрапортаў Вільні і Коўна
7- 7.12.2016, 14:15
- 17,844
Кампанія Ecolines адкрывае новы маршрут з Менска ў Вільню, Коўна і назад з заездамі ў аэрапорты літоўскіх гарадоў.
З 22 снежня міжнародны аўтобусны перавозчык Ecolines адкрывае новы рэгулярны маршрут Менск - Вільня - Коўна і назад з заездамі ў аэрапорты літоўскіх гарадоў. Пра гэта БелаПАН распавёў дырэктар Ecolines Павел Куцэнка.
Паводле ягоных слоў, аўтобусы будуць курсаваць маршрутам штодня, чатыры разы на суткі. З раскладам руху можна азнаёміцца на сайце кампаніі.
«Гэты кірунак з'яўляецца запатрабаваным у пасажыраў, да сённяшняга дня рэгулярныя перавозчыкі не рабілі заезду ў аэрапорты ў наўпроставым і зваротным кірунку», - сказаў Куцэнка.
Куцэнка адзначыў, што перавозчыкі, якія «арандуюць платформы на сталічным аўтавакзале і возяць пасажыраў у гарады і аэрапорты Літвы, Маскву, Санкт-Пецярбург, Кіеў і іншыя гарады, не з'яўляюцца рэгулярнымі міжнароднымі перавозчыкамі». Куцэнка мяркуе, што пасажыры на такіх рэйсах абароненыя не цалкам, а заказныя перавозкі пад выглядам рэгулярных «ставяць дзейнасць легальных рэгулярных перавозчыкаў заведама у нявыгаднае становішча».
Міжнародныя рэгулярныя пасажырскія перавозкі, адзначыў Куцэнка, мяркуюць наяўнасць у перавозчыка ліцэнзіі, а таксама адпаведнага дазволу кампетэнтных органаў краін, на тэрыторыі якіх праходзяць маршруты. Рэйсы такіх перавозчыкаў ёсць у раскладзе руху аўтавакзалаў, квіткі на рэйсы афіцыйных перавозчыкаў рэалізуюцца праз сістэмы продажу квіткоў, у якія нельга патрапіць, не маючы дзейных дазвольных дакументаў на рэгулярныя перавозкі пасажыраў.
Нагадаем, у хуткім часе авіяперавозчык Wizz Air увядзе новыя рэйсы Вільня - Варшава, а таксама з польскай сталіцы ў іншыя гарады Еўропы.