Да Каляд каралеву Элізабэт убралі ў швэдар са шчанюком коргі
3- 7.12.2016, 14:39
- 17,974
У Музеі Мадам Цюсо ўсю брытанскую каралеўскую сям'ю пераапранулі ў святочныя ўборы.
Васковую фігуру каралевы Вялікай Брытаніі Элізабэт II у лонданскім Музеі Мадам Цюсо пераапранулі ў калядны ўбор у рамках дабрачыннай акцыі, - паведамляе Reuters.
Цяпер на каралеве зялёны швэдар са шчанюком коргі, акрамя таго, супрацоўнікі музея пераапранулі ў святочныя колеры ўсю брытанскую каралеўскую сям'ю. Фігуры прынца Уільяма і герцагіні кембрыджскай Кейт Мідлтан паставілі побач і надзелі на іх двайны агульны швэдар.
У рамках акцыі наведвальнікі музея купляюць святочныя швэдры, сабраныя сродкі пойдуць на дапамогу дзецям, якія жывуць у нястачы.
«Усе любяць каралеўскую сям'ю і ўсе любяць коргі, так што для нас было надзвычай важна мець свой унёсак у кампанію», - сказала адна з кіраўніц кампаніі Хелена Уілтшыр.