Польскае войска аснасцяць дронамі, здольнымі пераносіць боегалоўкі
3- 7.12.2016, 14:31
- 9,394
Мінабароны Польшчы падпісала тры кантракты аб пастаўках рыштунку і ўзбраення для войска.
Урад Польшчы падпісаў тры кантракты аб пастаўках рыштунку і ўзбраення для войска. Пра гэта паведаміў міністр абароны Польшчы Антоні Мацярэвіч падчас размовы з блогерамі, паведамляе radiopolsha.pl.
Кіраўнік Мінабароны адзначыў, што дзякуючы такім кантрактам з польскімі заводамі Польшча павышае ўзровень сваёй гатоўнасці да абароны ад пагроз.
«Гэта вельмі важны крок ва ўмацаванні нашага войска, а таксама ў тых дзеяннях, той здольнасці польскага войска, якая будзе супрацьстаяць магчымым пагрозам з усходняга кірунку сучасным і эфектыўным спосабам», - сказаў польскі міністр.
Адзін з падпісаных кантрактаў датычыцца паставак першай партыі вырабленых у Польшчы дронаў, здольных пераносіць грузы, другі - вытворчасці боегаловак для гэтых апаратаў.
Трэцяя дамова датычыцца паставак оптаэлектрычнага рыштунку для войскаў тэрытарыяльнай абароны. Гаворка ідзе перш за ўсё аб прыцэлах і ноктавізарах.