«Газаваны соевы соус»: жыхары Ганконга дэгустуюць Лідскі квас

А таксама кефір, бярозавы сок і тварог.

Арцём Аншэлес, расейскі відэаблогер, які ўжо некалькі гадоў жыве ў Ганконгу, прызнаецца, што не заўсёды можа ўжываць мясцовую экзатычную ежу, якой яго частуюць ганконгскія сябры, паведамляе «Белсат».

Таму Арцём наважыў пачаставаць іх расейскай ежай, набыўшы для гэтага, праўда, беларускія прадукты - Лідскі квас, берасцейскі кефір, тварог і бярозавы сок.

Квас

«Спачатку пахне як [бальзам] «Зорачка», а потым - як японскі соевы соус», - ацэньвае яго дзяўчына.

«Смак нагадвае сіроп ад кашлю», - кажа хлопец.

Большасць дэгустатараў, аднак, прыходзіць да высновы, што квас - лепшы, чым здаецца на першы погляд, і дадаюць, што «быў бы не дрэнны разам з сушы».

Сок і малочныя прадукты з Берасця

Потым кітайцы спрабуюць па чарзе беларускі тварог («паглядзі, не пратэрмінаваны?») і кефір вядомай берасцейскай фірмы.

Запіваюць усё бярозавым сокам («на смак як вада з цукрам») таго ж вытворцы.

Увогуле, маладзёны добра забаўляюцца і спрабуюць беларускую ежу больш з цікавасцю, чым з агідай.