У Менску прадэманстравалі працы ўкраінскіх і беларускіх мастакоў з зоны АТА
3- 12.02.2016, 14:18
- 15,619
Мастакі прэзентавалі на выставе ва ўкраінскім пасольстве блізу 30 сваіх карцін.
Выстава ва ўкраінскім пасольстве 11 лютага прайшла ў незвычайнай атмасферы, піша «Наша Нiва». І справа нават не ў тым, што праект такога кшталту наважыліся ўпершыню паказаць у Менску. Ужо на ўваходзе ў фае пасольства на Старавіленскай вуліцы адчуваўся яе асаблівы фармат з нотай трагізму.
Свае творчыя работы прэзентавалі мастакі, якія пабывалі ў зоне АТА і рызыкавалі ўласным жыццём. «З Украінай у сэрцы» - такім стаў супольны праект украінскіх і беларускіх жывапісцаў і фатографаў. Гэтыя людзі на свае вочы ўбачылі адваротны бок жыцця. Такое ніколі не знікае ні з сэрца, ні з памяці.
Экспазіцыю, прысвечаную трагедыі на паўднёвым усходзе Украіны, адкрываў часовы павераны Украіны ў Беларусі Валерый Джыгун. Ён прымеркаваў адкрыццё выставы да гадавіны падпісання Менскіх дамоўленасцей.
Цягам паўгадзіны прысутныя маглі праглядзець дзве кароткаметражныя кінастужкі, у сюжэт якіх былі пакладзеныя трагічныя падзеі на паўднёвым усходзе Украіны. Вялікая ўвага таксама была ўдзеленая гібелі беларуса Міхаіла Жызнеўскага ў гушчы падзей ўкраінскай рэвалюцыі. У асяроддзі мастакоў адзначылі, што хлопец чалавек «загінуў праз расейскую зброю». Сярод гледачоў быў заўважаны і амбасадар Літвы ў Беларусі Эвалдас Ігнатавічус.
Ніводзін з шасцярых мастакоў, што творча пераасэнсавалі падзеі на Данбасе, не застаўся па-за ўвагай. Дарэчы, выставу яны арганізавалі за ўласныя сродкі. Тарас Носар, Генадзь Драздоў, Алесь Цыркуноў, Алесь Суша, Андрэй Такінданг, Алесь Пушкін прэзентавалі блізу 30 сваіх карцін.
Акрамя карцін прафесійных мастакоў, арганізатары ўключылі ў экспазіцыю і некалькі дзіцячых малюнкаў, а таксама фатаграфіі.
Беларускі мастак і ўдзельнік выставы Генадзь Драздоў распавёў пра мэты правядзення экспазіцыі аб ваенных матывах ва Украіне.
«Наша выстава - гэта першы крок да таго, каб паспрабаваць мастацкімі сродкамі выказаць трагедыю і данесці яе да гледача. Такім чынам мы хочам зрабіць унёсак у прымірэнне двух бакоў», - заявіў беларускі мастак Генадзь Драздоў.
Пасля выступу ўкраінца мастака Тараса Носара зала апладавала. Хвалюючая ўкраінская мова чалавека, які не з чутак ведае, што такое чалавечае гора, не пакінула нікога абыякавым. На выставе Тарас быў адзіным прадстаўніком мастакоў ад украінскай дыяспары. Як выказаўся сам Носар, яму было «і радасна, і адначасова - сумна» прадстаўляць Украіну толькі ад адной асобы - сваёй уласнай.
«Мышы і сабакі - гэта ўсё, што ёсць у Пясках. Больш там нікога няма. Але моцна не хочацца, каб наша зямля была такой, я думаю, яна будзе адзінай, і таксама думаю, што там не будзе гэтых мышэй і сабак», - выказаў надзею Тарас Носар.
Ягоны беларускі калега, Аляксандр Цыркуноў, заклікаў прысутных украінцаў звярнуцца ў Міністэрства культуры з просьбай адкрыць у Беларусі бібліятэку імя Тараса Шаўчэнкі. І нагадаў, што 2016 год у Беларусі - гэта год культуры.
«Мне як беларусу крыху сорамна, што мы маем столькі розных бібліятэк, у тым ліку расейскіх вельмі шмат, а ўкраінскай няма ніводнай. Ёсць бульвар Шаўчэнкі, ёсць сквер Шаўчэнкі, а бібліятэкі няма», - сказаў Цыркун, згадаўшы таксама пра год культуры ў Беларусі.
Выставу наведаў і першы беларускі ўладальнік літаратурнай прэміі «Воін Святла» Анатоль Бароўскі за кнігу «Воляй абраны». Саму прэмію заснавалі Нацыянальны саюз пісьменнікаў Украіны і Саюз беларускіх пісьменнікаў летам 2015 года. Такой прэміяй адзначаюць найлепшую беларускую або ўкраінскі прозу.
Побач з карцінамі мастакоў змясціўся інфармацыйны стэнд з інфармацыяй аб украінскай лётчыцы Надзеі Саўчанцы.