Чубараў заклікаў беларусаў заблакаваць расейскія фуры на прыклад Украіны

На думку палітыка, такім чынам Расея адчуе наступствы анэксіі Крыма.

Кіраўнік Меджліса крымскататарскага народа Рэфат Чубараў выказаў падтрымку актывістам, якія стварылі блакаду расейскіх дальнабойнікаў на заходніх межах Украіны і заклікаў беларусаў і жыхароў Балтыі рабіць тое ж самае. Адпаведны запіс ён зрабіў у сваім Facebook, паведамляе charter97.org.

«Абсалютна падтрымліваю грамадзянскую ініцыятыву суграмадзян у Закарпацкай, Львоўскай, Валынскай, Івана-Франкоўскай, Чарнавіцкай, Вінніцкай і Жытомірскай абласцях, якія заблакіравалі на тэрыторыі сваіх абласцей транзіт грузавога транспарту, якія належаць юрыдычным і фізічным асобам Расейскай Федэрацыі, а таксама іншага транспарту, які перавозіць грузы расейскіх кампаніяў або на адрас расейскіх кампаній.

Цалкам адказная пазіцыя грамадзянскай супольнасці Украіны ў адказ на поўную забарону РФ на транзіт тавараў з Украіны праз сваю тэрыторыю, уведзены ёю з 4 студзеня 2016 года.

Уяўляецца важным вядзенне перамоваў з актывістамі грамадзянскай супольнасці Беларусі, Латвіі, Літвы, Эстоніі аб арганізацыі імі такіх акцый на тэрыторыях сваiх дзяржаў.

Расея, што акупавала Крым і развязала вайну на Усходзе Украіны, павінна быць цалкам ізаляваная ад цывілізаванага свету датуль, пакуль апошні расейскі жаўнер не пакiне тэрыторыю незалежнай Украіны ў яе міжнародна прызнаных межах, уключаючы Крым», - напісаў Рэфат Чубараў.

Як паведамляў сайт charter97.org, акцыя блакавання расейскіх фур пачалася на ўездзе ў Закарпацкую вобласць, праз якую фуры павінны ехаць у Славакію і Вугоршчыну. Таксама актывісты са Львоўшчыны, Валыні і Ровенскай вобласці блакуюць расейскія грузавікі.

Акцыя адбываецца на фоне таго, што Польшча забараніла ўезд на сваю тэрыторыю расейскаму грузавым транспарту. Таму фуры, якія ехалі з Расеі ў ЕЗ праз Беларусь, пачалі ўязджаць ва Украіну на Валынь, каб патрапіць з Закарпацця ў Славакію або Вугоршчыну.