МакКейн: Пуцін пачаў у Сірыі данбаскі сцэнар
11- 14.02.2016, 16:00
- 29,941
РФ хоча стварыць у Сірыі «другі Крым або Калінінград», каб забяспечыць безупыннае ўздзеянне на блізкаўсходні рэгіён.
Пра гэта амэрыканскі сэнатар Джон МакКейн заявіў у выступе на Мюнхенскай канферэнцыі бяспекі, паведамляе «Еўрапейская праўда».
Паводле ягоных слоў, Пуцін мае «стварыць у Сірыі гэтакі Крым або Калінінград», каб забяспечыць безупыннае ўздзеянне на блізкаўсходні рэгіён.
«Расейскае ўмяшанне стабілізавала рэжым Асада і дазволіла Асаду перайсці ў наступ», - нагадаў сэнатар.
Ён таксама заявіў, што не верыць у пагадненне аб часовым замірэнні, дасягнутае днямі з удзелам РФ.
«Пуцін пагадзіўся на замірэнне? Але мы ўжо бачылі гэтае кіно.
Расея выкарыстоўвае гэта, каб прасунуцца ў вайсковым плане, стварыць на месцы новыя вайсковыя магутнасці. Яна выкарыстоўвае праблемы з пастаўкамі гуманітарнай дапамогі як аргумент для дыпламатычнага гандлю і цяпер вызначае, калі аднавіць напад.
І гэты сцэнар спрацуе толькі дзякуючы таму, што мы згаджаемся на яго», - адзначыў МакКейн.
«Расея пад заслонай дапамогі пастаўляе зброю і амуніцыю. Яна не зацікаўленая ва ўсталяванні міру ні ва Украіне, ні ў Сірыі», - дадаў сэнатар.
Акрамя таго, МакКейн мяркуе, што Расея наўмысна стварае плынь уцекачоў з Сірыі ў ЕЗ, каб разбурыць адзінства Еўропы і Еўразвязу ў цэлым.
Паводле ягоных слоў, расейскае кіраўніцтва наўмысна пагаршае гуманітарную сітуацыю ў Сірыі.
«Пуцін хоча выкарыстоўваць Сірыю як палігон для найноўшай расейскай зброі. Ён хоча справакаваць новую хвалю ўцекачоў, каб сагразіць Еўропе, каб падзяліць Паўночнаатлантычны альянс і каб падважыць еўрапейскі праект», - сказаў сярод іншага ён.
«І апетыт Пуціна будзе расці падчас ядзення», - адзначыў сэнатар.