Ці застануцца замежныя крамы выгадныя для беларусаў?

Абмежаванні на бязмытны ўвоз запрацуюць праз два месяцы.

Лукашэнка падпісаў указ №40, які вызначае новыя правілы ў мытаванні пасылак праз мяжу і абмяжоўвае кошт тавараў,што ўвозяцца беларусамі, нагадвае «Комсомольская правда в Беларуси».

Цяпер без мыт можна...

...атрымаць пасылкі не даражэйшыя за 22 еўры

Не трэба будзе даплочваць за пасылку, калі яе кошт менш за 22 еўры, а вага - не больш за 10 кілаграмаў. Раней абмежаванне было такое: 200 еўраў і 31 кілаграм. Як гэта працуе? Напрыклад, вы замовілі і аплачваеце ў замежнай інтэрнэт-краме тавар (тэлефон, туфлі, сумку - усё, што заўгодна) коштам 25 еўраў. Калі пасылка прыйдзе ў Менск, вы павінны будзеце аплаціць мыту 3 еўры. Стаўкі мыт засталіся ранейшыя: 30% ад перавышэння кошту, але не менш за 4 еўра за кілаграм. Мыта складзе 0,9 еўра паводле курсу Нацбанка на дзень аплаты.

Важнае ўдакладненне: усе вашы пасылкі, якія вы заказваеце ў месяц, абагульняюцца. Гэта значыць, калі ў пачатку месяца вам прыйшла пасылка з сукенкай за 10 еўра, а ў канцы - з туфлямі за 15 еўраў, то перабор складзе 3 еўры. І з гэтай сумы, атрымліваючы ў другі раз пасылку, вы павінны будзеце заплаціць мыту.

Дарэчы, дакумент уводзіцца ў дзеянне праз два месяцы пасля яго афіцыйнага апублікавання. На вечар пятніцы ўказ №40 яшчэ не быў апублікаваны. Таму як мінімум два месяцы, каб зрабіць заказ у замежнай інтэрнэт-краме на суму да 200 еўра, у вас яшчэ ёсць. Праўда, калі пасылка прыйдзе ў той момант, калі ўказ увойдзе ў дзеянне, то вам давядзецца заплаціць мыту.

...раз на тры месяцы завезці куплі - на 300 еўраў

Калі вы рэгулярна ездзіце на шопінг у суседнія краіны, то ў першы раз мытня дазволіць бязмытна правезці вам пакупкі паводле старых нормаў - на суму ў 1,5 тысячы еўраў і вагой не больш за 50 кг. А вось потым тры месяцы, пры кожным перасячэнні мяжы, вам давядзецца заплаціць пошліну з тавараў, коштам вышэйшым за 300 еўраў альбо цяжэйшымі 20 кг.

- Калі грамадзяне будуць перасякаць мяжу часцей чым раз на тры месяцы, то тавары сумай звыш 300 еўраў не будуць прызнавацца мытнымі органамі таварамі для асабістага карыстання і, такім чынам, будуць абкладацца мытнымі плацяжамі, - цытуе БелТА намесніка старшыні Дзяржаўнага мытнага камітэту Уладзіміра Арлоўскага.

Дарэчы, будуць і выключэнні. Па-першае, калі вы ляціце на самалёце. У гэтым выпадку рызыка таго, што вы тавар вязеце не для сябе, а з камерцыйнай мэтай, мінімальны - і мыту плаціць не трэба будзе. Па-другое, не будзе прымяняцца ўказ у дачыненні да супрацоўнікаў дыппрадстаўніцтваў і консульстваў.

Ці застануцца замежныя крамы выгадныя для беларусаў?

Нават з улікам нізкага кошту на тавар абмежаванне ў 22 еўры на месяц - істотная. Сукенка, туфлі замовіць можна. Але вось за той жа мабільны тэлефон, якія цяпер масава закупляюць у Кітаі, давядзецца выкласці мыту. Ці застанецца выгада? «КП» параўнала дзве аднолькавыя мадэлі смартфона, якія прадаюцца ў менскай інтэрнэт-краме і ў замежнай.

Кошт смартфона на Аliexpress - 153 еўры. Пры гэтым у Беларусь прапануюць яго даставіць бясплатна. У сталічнай інтэрнэт-краме такі ж мабільны тэлефон каштуе 5,45 мільёна рублёў, або 218 Еўра. Дапусцім, ваш тэлефон прыбывае ў Беларусь ужо падчас дзеяння ўказа. Такім чынам, вы павінны будзеце заплаціць за яго мыту ў суме 39,3 еўра. То бок, кошт вашага тэлефона ўзрастае да 192,3 еўра. Выгада ў параўнанні з менскай крамай - 25,7 еўра.

Дарэчы

Паводле статыстыкі мытні, за апошнія тры гады аб'ём увезеных пасылак праз мяжу павялічыўся больш чым у 6 разоў. Калі ў 2013 годзе беларусы атрымалі ўсяго 1,9 млн. пасылак, то ў 2015 годзе іх было ўжо амаль 12 мільёнаў.