Самалёт у Палангу для беларусаў амаль зраўняўся з коштам аўтобуса

Першы новы напрамак гэтага года беларуская авіякампанія адкрыла ў літоўскую Палангу.

Дамову з мэрыяй падпісалі ў пятніцу, а сам старт палётаў пачнецца ўжо ў чэрвені. Анансуецца, што кошт квітка будзе нізкім, супастаўным з коштам білета на аўтобус. Літоўскія ўлады мяркуюць, што Паланга цалкам можа замяніць Турцыю і Егіпет. Onliner.by параўналі кошты і даведаліся, ці танней простаму беларусу памяняць Шарм-эль-Шэйх на Балтыку.

- У Палангу будуць лётаць Boeing 737-500. Зараз з 125 месцаў выкупленыя ўжо 95, - распавёў на падпісанні дамовы ў Літве намеснік генеральнага дырэктара «Белавія» Ігар Чаргінец.

- Кошт квіткоў ад 99 еўра ў абодва бакі. Як мы падлічылі з калегамі, гэта супастаўна з коштам пераезду ў Палангу наземны транспартам. Калі дабірацца на цягніку да Вільні, а потым на аўтобусе да Палангі, то будзе каштаваць 45 еўраў у адзін бок і зойме 8 гадзін. Мы ж прапануем пералёт супастаўным коштам, але за 70 хвілін. І яшчэ паўгадзіны - праходжанне мытнага і памежнага кантролю ў аэрапорце.

Цікавы факт, што такія параўнальна танныя авіябілеты для беларусаў фактычна «праплаціў» Еўразвяз. «Белавія» выйграла конкурс у праграме развіцця ўязнога турызму ў Літву. Якую суму выдзелілі канкрэтна для «Белавія», кампанія не кажа. Вядома толькі, што Еўразвяз штогод на гэтую праграму вылучае блізу мільёна еўраў.

- Паводле нашых падлікаў, кожны прыезджы беларус траціць у Паланзе ў сярэднім 300 еўраў. Таму для нас выгадныя турысты, - кажа мэр горада Шарунас Вайткус. - Толькі за мінулы год да нас звярнуліся 11 тысяч беларусаў. Але гэта без уліку велізарнага прыватнага сектара. Рэальная ж лічба большая ўтрая. Мы спадзяемся на павелічэнне турыстычнай плыні з Беларусі, асабліва на фоне сітуацыі ў Егіпце і Турцыі. У нас спакойна.

Праўда, альтэрнатыўныя варыянты з Менска ў Палангу наземным транспартам пакуль усё роўна таннейшыя. Туркампаніі прапануюць пераезд з Менска коштам 55-60 еўраў у абодва бакі з улікам турзбору. Па часе гэта будзе 8 гадзін, не лічачы праходжання мяжы.

Калі паспрабаваць варыянт з перасадкай, то цягнік Менск - Вільня будзе каштаваць 24 еўры туды-назат, аўтобус з Вільні да Палангі ў абодва бакі каштуе 48 еўраў. Разам - 72 еўры і 8-9 гадзін у дарозе. Яшчэ ёсць схема «аўтобус - аўтобус» з перасадкай у Вільні. Гэты варыянт будзе каштаваць 66-70 еўраў.

У сярэднім адпачынак на 10 дзён у Паланзе без уліку харчавання можа каштаваць ад 300 еўраў на чалавека: 100 еўра за пералёт, кошты на жыллё ў Паланзе вар'іруюцца ад 10 да 50 еўраў за ложка-месца ў дзень.

Сярэдні чэк у звычайнай кавярні за салат, гарачае і напой складае 15-20 еўраў без алкаголю. Фастфуд будзе каштаваць блізу 3-4 еўраў.

Ёсць і бюджэтныя варыянты: многія адпачывальнікі купляюць гатовую ежу ў супермаркетах. У некаторых з іх вечарам ёсць зніжкі 50%.

Для параўнання, туры ў Егіпет са сняданкамі і вылетам з Менска каштуюць блізу 320-580 еўраў на 10 дзён у залежнасці ад гатэля. Прыкладна ў гэтым жа коштавым дыяпазоне будуць і аналагічныя туры ў Турцыю.

- Мы прагназуем, што сёлета попыт на гэты кірунак вырасце на 20%, - мяркуе экспэрт у адпачынку на Балтыйскім узбярэжжы, дырэктарка турагенцтва «Вакол свету» Марына Кандрашова. - І па кошце гэта цалкам можа стаць альтэрнатывай Егіпту і Турцыі. У нас ёсць пакеты і па 340 еўраў з вылетам з Менска. Гэта блізу 400 даляраў за добры еўрапейскі сэрвіс.

Дарэчы, адразу пасля ўвядзення недарагіх рэйсаў у Палангу «Белавія» збіраецца зрабіць таннейшым квіткі на 10% праз крызіс у галіне.

- Толькі за мінулы год мы знізілі кошт тарыфаў на 20%, - патлумачыў намеснік генеральнага дырэктара беларускай авіякампаніі. - З лістапада рынак упаў на 10-15%. Што будзе далей, невядома. Даводзіцца скарачаць выдаткі. Таму сёлета мы наважылі таксама зніжаць тарыфы.