Дзесяткі тысяч сірыйцаў уцякаюць з Алепа, ратуючыся ад расейскіх бамбёжак

50 тысяч уцекачоў прыбылі на мяжу з Турцыяй.

Дзесяткі тысяч чалавек 5 лютага ўцякалі з сірыйскага Алепа ў бок турэцкай мяжы ў той час, як расейскія паветраныя сілы ўзмацнілі бамбардзіроўкі ў паўночнай частцы Сірыі па сілах апазіцыйных груп, якія ваююць з рэжымам прэзідэнта Башара Асада, паведамляе «Голос Америки».

Прадстаўнікі Турэцкага гуманітарнага фонду паведамілі, што 50 тысяч уцекачоў прыбылі на мяжу з Турцыяй - нягледзячы на тое, што Анкара закрыла кантрольна-прапускныя пункты і пытанне аб тым, ці дазволяць уцекачам перасекчы мяжу, застаецца адкрытым. Дабрачынная арганізацыя таксама паведаміла, што пачала будаваць намётавы лагер у Сірыі.

Турцыя, ужо якая прыняла больш за 2,5 мільёны сірыйскіх уцекачоў з пачатку грамадзянскай вайны ў Сірыі амаль пяць гадоў таму, паведамляе, што цяпер яшчэ тысячы сірыйцаў знаходзяцца на шляху да яе мяжы.

Новы паток уцекачоў утварыўся пасля таго, як урадавыя сілы пры падтрымцы расейскай авіяцыі пачалі наступ у паўночнай частцы Сірыі, маючы намер узяць у акружэнне Алепа - найбуйнейшы горад краіны.

Міністэрства абароны Расеі заявіла, што расейскія самалёты нанеслі ўдары па 875 мэтах у Сірыі на гэтым тыдні, уключаючы мэты ў паўночных рэгіёнах.

Сірыйскае навінавае агенцтва SANA паведамляе, што ўрадавыя сілы вярнулі кантроль над невялікім населеным пунктам Рыцьян на поўнач ад Алепа - пасля таго, як раней на гэтым тыдні ўвайшлі ў два іншыя найбліжэйшыя гарады. Да пачатку вайны Алепа з насельніцтвам два мільёны быў найбуйнейшым камерцыйным цэнтрам Сірыі. Сёння горад падзелены паміж паўстанцамі і ўрадавымі сіламі.

Войскі Асада таксама перайшлі ў атаку і на поўдні краіны - дзяржаўныя СМІ паведамляюць аб захопе гарадоў каля сталіцы правінцыі Дар’а.

Тым часам пасланнік Арганізацыі Аб'яднаных Нацый Стефан дэ Містура паведаміў пра спробы ацаніць магчымасць міжнароднай падтрымкі – між іншым, ад Злучаных Штатаў, Расеі і Ірана - для аднаўлення перамоўнага працэсу аб Сірыі, распачатага на гэтым тыдні ў Жэневе і перанесенага на канец лютага адразу пасля пачатку першых сустрэч.

Са слоў прадстаўніка ААН, ён адновіць перамовы ў выпадку, калі надзея на прагрэс будзе існаваць.

«Я паўтаруся: я не буду весці перамовы дзеля перамоваў, гэта непрымальна, - падкрэсліў дэ Містура. - Мы сядаем за стол перамоваў з мэтай выпрацоўкі пагаднення».

Генеральны сакратар NATO Енс Столтэнбэрг заявіў, што ўдары расейскай авіяцыі ў Сірыі падрываюць намаганні, накіраваныя на пошук невайсковага развязання канфлікту. Пра гэта Столтэнбэрг заявіў у пятніцу на сустрэчы міністраў абароны Еўрапейскай Рады ў Амстэрдаме.

Генеральны сакратар Альянсу падкрэсліў, што інтэнсіўныя бамбёжкі ВПС Расеі ў Сірыі ў большасці вядуцца па мэтах апазіцыі і ўзмацняюць напружанасць, удары таксама парушаюць паветраную прастору NATO і Турцыі.

Жэнеўскія перамовы былі спыненыя збольшага праз расейскія бамбёжкі - прадстаўнікі сірыйскага ўрада пакінулі залю, папярэдне праінфармаваўшы прысутных аб тым, што войска Асада атрымала буйную перамогу, прарваўшы блакаду двух шыіцкіх пунктаў у Алепа.