Выведка ЗША: Паўночная Карэя запусціла плутоніевы рэактар
5- 9.02.2016, 19:58
- 14,050
КНДР аднавіла працу плутоніевага рэактара ў Ёнбэне і можа стварыць запасы плутонію цягам некалькіх тыдняў.
Пра гэта заявіў дырэктар Нацыянальнай выведкі ЗША Джэймс Клэпар, паведамляе расейская служба BBC.
"Мы мяркуе, што Паўночная Карэя дастаткова доўга выкарыстоўвае рэактар, каб пачаць здабываць плутоній цягам некалькіх тыдняў ці месяцаў", - сказаў Клэпар, выступаючы ў кангрэсе.
Ён таксама паведаміў, што Пхеньян спрабуе стварыць міжкантынентальную балістычную ракету.
Раней паўднёвакарэйскія і амерыканскія вайскоўцы паведамілі, што ўночы 7 лютага Паўночная Карэя ажыццявіла запуск балістычнай ракеты далёкага дзеяння з выпрабавальнага палігона на паўночным захадзе краіны.
Паўночнакарэйскія ўлады яшчэ ў верасні заяўлялі, што плутоніевы рэактар у Ёнбэне аднавіў працу ў звычайным рэжыме.
Гэты рэактар з'яўляецца галоўнай крыніцай плутонію, патрэбнага для рэалізацыі паўночнакарэйскай ядзернай праграмы.
"З нашай ацэнкі, Паўночная Карэя следам за гэтай заявай пашырыла магутнасці для ўзбагачэння ўрану і аднавіла работу рэактара для вырабу плутонію", - заявіў Джэймс Клэпар, выступаючы ў сенацкім камітэце ўзброеных сіл.
"Таксама, паводле нашых ацэнак, гэты рэактар працуе дастаткова доўга, бо ён ужо можа пачаць выраб плутонію з адпрацаванага паліва цягам бліжэйшых тыдняў ці месяцаў", - дадаў ён.
Для вырабу ядзернай бомбы магутнасцю 20 кілатон трэба чатыры кілаграмы плутонію.
Пхеньян некалькі разоў абяцаў спыніць працы ў сваім ядзерным цэнтры ў Ёнбэне і ў 2008 годзе ў рамках праграмы раззбраення нават разбурыў вентыляцыйна-астуджальную вежу ўстаноўкі.
Рэактар магутнасцю 5 МВт быў спынены ў 2007 годзе ў рамках дамоўленасцяў, дасягнутых на шасцібаковых перамовах аб ядзернай праграме Пхеньяна з удзелам дзвюх Карэй, Кітая, Расеі, ЗША і Японіі.
Аднак у сакавіку 2013 года, пасля астуджэння стасункаў з ЗША і ўвядзення новых санкцый ААН, паўночнакарэйскія ўлады паабяцалі зноў запусціць рэактар.