Крайнія левыя палосы МКАД каля Каменнай Горкі перагародзяць на 1,5 месяца
- 17.03.2016, 19:44
- 20,662
Кіроўцы блытаюцца ў новай схеме руху
Мікрараён Каменная Горка і вёску Тарасава гэтым летам павінен звязаць надземны пешаходны пераход. Падрыхтоўчыя працы перад яго будаўніцтвам пачаліся ў мінулыя выходныя.
«Ужо ўзгодненая часовая схема арганізацыі руху, асноўныя работы будуць праходзіць у месцы ўстаноўкі апоры моста - каля раздзяляльнай зоны, - паведамілі Onliner.by у ДАІ Фрунзенскага раёна. - Для гэтага часова ператнуць крайнія левыя палосы ў абодвух кірунках. Паводле папярэдніх звестак, абмежаванні ў руху будуць доўжыцца блізу паўтара месяца».
Дзве апоры моста па абодва бакі ад колавай дарогі ўжо стаяць, засталося ўсталяваць сярэднюю - гэта і выкліча абмежаванні руху. «Ужо цяпер на адцінку будаўнічых работ усталяваныя часовыя знакі, што паніжаюць хуткасць: спачатку да 70, потым да 50 км/г, - дапоўнілі ў ДАІ. - Праект прадугледжвае захаванне трох шэрагаў у кожным кірунку на час работ - за кошт паласы разгону».
Некаторыя кіроўцы едуць па-старому, праз гэта на дарозе ўзнікаюць канфлікты. Адзін з прыкладаў - відэа, зробленае карыстальнікам нашага форуму AlexKhlustov. Аўтар заязджае на адцінак вядзення будаўнічых работ на даволі высокай хуткасці (95 км/г, з ягоных слоў) пры тым, што знакі патрабуюць рухацца не хутчэй за 50 км/г. Адсутнасць разгоннай паласы прыводзіць да небяспечнай сітуацыі, якая пагражае спадарожным сутыкненнем. Кіроўца Subaru мог проста не ведаць аб новай арганізацыі руху і разлічваў патрапіць акурат на паласу разгону.