Байкера, які наехаў на інспектара ДАІ, хочуць адправіць у СІЗА

Нягледзячы на траўмы, матацыкліста хочуць перавесці са шпіталя ў ізалятар часовага ўтрымання на вуліцы Акрэсціна.

Байкер Сяргей Шаўцоў выклаў у сацсетках пастанову пра сваё затрыманне. З яго слоў, там вельмі сказілі факты пра тое, што адбылося раніцай 18 красавіка на скрыжаванні праспектаў Машэрава і Незалежнасці, паведамляе «Еўрарадыё».

У пастанове напісана, што байкер рухаўся па трамвайных шляхах праспекта Машэрава з боку вуліцы Чырвонай у кірунку Залатой Горкі і спыніўся перад скрыжаваннем на святлафоры. Потым учыніў наезд на інспектара ДАІ, пасля чаго выехаў на скрыжаванне, дзе сутыкнуўся з машынай інкасатараў.

У пастанове няма ні слова пра адсутнасць нумарных знакаў у матацыкла (пра гэта ўчора паведамляла ДАІ). Наадварот, у ім указаны яго нумар! Таксама няма інфармацыі аб тым, чаму і як інспектар апынуўся перад байкерам на трамвайных шляхах.

Раней паведамлялася, што байкер ехаў без нумарных знакаў, таму інспектар ДАІ наважыў затрымаць яго. Паводле версіі ДАІ, байкер наважыў уцячы і працягнуў за сабой інспектара на скрыжаванне. Паводле версіі самага байкера, інспектар схапіўся за стырно і пракруціў ручку газу, а ён ад нечаканасці адпусціў счапленне, і матацыкл выехаў на скрыжаванне, дзе і адбылося сутыкненне з машынай інкасатараў.

Апошняе, што паведамляў байкер Сяргей Шаўцоў, - што, нягледзячы на траўмы, яго хочуць перавесці з лякарні (ён там знаходзіцца пад вартай) у ізалятар часовага ўтрымання на вуліцы Акрэсціна ў Менску. Потым ён знік з сувязі, са слоў яго сяброў, у байкера забралі мабільны тэлефон.

«Нягледзячы на стан здароўя, следчыя хочуць узяць мяне пад варту ў ІЧУ на Акрэсціна. Патрэбна дапамога», - напісаў байкер.

Калі ўлічваць пастанову, гэта ўжо трэцяя афіцыйная версія.