Аргкамітэт кангрэса дэмакратычных сіл просіць у Менгарвыканкама памяшканне

Наважана таксама змяніць назву мерапрыемствы на Беларускі нацыянальны кангрэс.

27 красавіка прадстаўнікамі аргкамітэту правядзення кангрэса дэмакратычных сіл Мікалаем Статкевічам і Генадзем Фядынічам была пададзена заяўка ў Менгарвыканкам на арэнду памяшкання для правядзення запланаванага на 15 траўня мерапрыемства.

Як паведаміў БелаПАН Статкевіч, у кангрэсе чакаецца ўдзел мінімум 500-600 чалавек.

- Мы звярнуліся ў Менгарвыканкам даць любое памяшканне на тэрыторыі Менска, здольнае змясціць такую колькасць удзельнікаў, - сказаў ён.

Палітык паведаміў, што спачатку аргкамітэт спрабаваў знайсці памяшканне самастойна, карыстаючыся тым, што ў яго складзе ёсць прадстаўнікі зарэгістраваных арганізацый, якія маюць права праводзіць сходы ў памяшканнях без санкцый уладаў.

- Але ўсё скончылася тым, што таварышы настойліва не рэкамендавалі здаваць нам памяшканне, і тыя, хто спачатку быў гатовы гэта зрабіць, адмаўляліся. Таму мы звяртаемся наўпрост да ўладаў: хай тады яны нам яго дадуць. Калі памяшканне не будзе выдадзена, кангрэс будзе праведзены пад адкрытым небам, - заявіў Статкевіч.

Таксама стала вядома, што аргкамітэт у правядзенні кангрэса дэмакратычных сіл прыняў пастанову аб змене назвы мерапрыемства.

- Мы прынялі пастанову скарэктаваць назву кангрэса ў сувязі з тым, што будзем рэкамендаваць дэлегатам уважаць кангрэс пастаянна дзеючым аб'яднаннем дэмакратычных сіл. Кангрэс дэмакратычных сілаў - гэта разавае мерапрыемства. Таму цяпер яно называецца Беларускі нацыянальны кангрэс, - растлумачыў Статкевіч.

Са слоў палітыка, дэлегатам будзе прапанавана абраць стала дзейны орган - савет кангрэса, уключыўшы туды прадстаўнікоў рэгіёнаў і цэнтральных органаў дэмакратычных партый і арганізацый.

Правядзенне кангрэса дэмакратычных сіл з мэтай кансалідацыі апазіцыі ініцыявала 17 снежня 2015 года гурт вядомых грамадскіх дзеячаў. На наступны дзень Мікалай Статкевіч, Уладзімір Някляеў і Станіслаў Шушкевіч абвясцілі пра стварэнне аргкамітэта ў падрыхтоўцы кангрэса. Цяпер акрамя іх у склад аргкамітэту ўваходзяць Зміцер Дашкевіч, Вячаслаў Сіўчык, Андрэй Саннікаў, Генадзь Фядыніч і Міхаіл Пастухоў.