Мужчына ўпаў са шматпавярховага недабудаванага аб’екта ў Менску
- 28.04.2016, 14:07
- 14,482
Следчыя разглядаюць усе версіі здарэння, у тым ліку суіцыд.
Мужчына зваліўся з новабудоўлі ў Менску. Пра гэта паведаміў БелТА афіцыйны прадстаўнік управы Следчага камітэта горада Менску Аляксандр Герасімаў.
"На месцы здарэння працуе следча-аператыўная група. Высвятляюцца абставіны гібелі мужчыны 1985 года нараджэння на тэрыторыі адной з новабудоўляў на вуліцы Мсціслаўца", - заявіў Аляксандр Герасімаў.
Інцыдэнт здарыўся 28 красавіка блізу 10.40. Высветлена, што мужчына загінуў у выніку падзення з даху вышыннага будынка. Следчыя разглядаюць усе версіі здарэння, у тым ліку суіцыд.
"Загінулы быў падсобным рабочым. Ён быў заняты на будаўніцтве суседняга аб'екта. Да будынка, з якога адбылося яго падзенне, дачынення не меў і не павінен быў там знаходзіцца", - растлумачыў Аляксандр Герасімаў. На месцы трагедыі працуюць таксама прадстаўнікі Дзяржаўнага камітэта судовых экспэртыз Беларусі.