Улады спужаліся шэсця на Дзень Волі

Дзесяці ўдзельнікам акцыі на Дзень Волі прысудзілі штрафы ад 10 да 40 базавых велічынь.

Суд Савецкага раёна Менску 28 красавіка прысудзіў дзесяцём удзельнікам акцыі 25 сакавіка з нагоды Дня Волі штрафы сумаю ад 10 да 40 базавых велічынь (2,1-8,4 млн рублёў), паведамляе БелаПАН.

Старшыню Партыі БНФ Аляксея Янукевіча асудзілі на 35 базавых велічынь (7 млн 350 тыс. рублёў). «Суд палічыў, што я ўдзельнічаў у «несанкцыянаваным мітынгу» каля кінатэатра «Кастрычнік», хоць гэта месца было дазволена для збору ўдзельнікаў акцыі, - паведаміў Янукевіч. - На іх думку, несанкцыянаваным мітынгам з'явілася масавая прысутнасць грамадзян і выкрыкванне лозунгаў, прычым я выкрыкваў іх праз гукаўзмацняльную апаратуру».

Як паведамляюць праваабаронцы, каардынатар кампаніі «Еўрапейская Беларусь» Максім Вінярскі аштрафаваны на 35 базавых велічынь, сябра Аб'яднанай грамадзянскай партыі Мікалай Казлоў - на 40 базавых велічынь, сустаршыня аргкамітэта ў стварэнні партыі Беларуская хрысціянская дэмакратыя Віталь Рымашэўскі - на 10 базавых велічынь. Актывісты апазіцыі Мікалай Колас і Зміцер Дашкевіч аштрафаваныя на 20 базавых велічынь кожны, Кацярына Людвіг - на 25 базавых велічынь, Аляксандр Макаеў, Дзмітрый Сільчанка і Яўген Батура - на 30 базавых велічыняў кожны.

Пакуль не вядома, якія вынікі ў дачыненні да актывіста Дзмітрыя Паліенкі.

Нагадаем, Менгарвыканкам дазволіў правядзенне ў сталіцы 25 сакавіка акцыі з нагоды Дня Волі ў фармаце: збор удзельнікаў ля кінатэатра «Кастрычнік», шэсце па вуліцы Сурганава да плошчы Бангалор, мітынг у парку Дружбы Народаў. Аднак некаторыя палітыкі і актывісты перад пачаткам дазволенага шэсця ўзялі ўдзел ва ўскладанні кветак да помніка Янку Купалу ў аднайменным скверы, правялі там мітынг і прайшлі калонай па праспекце Незалежнасці да кінатэатра «Кастрычнік».

За ўдзел у «несанкцыянаваных» мерапрыемствах 25 cакавіка ўжо асуджаныя апазіцыйныя палітыкі Уладзімір Някляеў і Анатоль Лябедзька - кожны з іх аштрафаваны на 50 базавых велічыняў (10,5 млн рублёў).