АБСЕ расчараваная пастановамі беларускага Цэнтрвыбаркама

Кіраўніцтва арганізацыі адзначыла нежаданне ўлад праводзіць заканадаўчыя рэформы.

Віцэ-старшыня Парламенцкай асамблеі АБСЕ, кіраўнік працоўнай групы аб Беларусі Кент Харстэд выступіў з заявай у сувязі з намерамі Цэнтрвыбаркама Беларусі ўжыць на будучых «парламенцкіх выбарах» некаторыя рэкамендацыі Бюро дэмакратычных інстытутаў і правоў чалавека (БДІПЧ) АБСЕ, піша БелаПАН.

«Беларускі ўрад пагадзіўся рэалізаваць некаторыя з рэкамендацый БДІПЧ АБСЕ, зробленых пасля назірання за апошнімі« выбарамі» ў краіне. Аднак я шкадую, што даўно наспелыя змены выбарчага заканадаўства не прадбачацца за найбліжэйшыя месяцы», - цытуе Харстэда прэс-служба ПА АБСЕ.

Паводле ягоных слоў, «яшчэ трэба будзе высветліць на практыцы, якім чынам заявы, зробленыя на самым высокім узроўні выбарчай адміністрацыі, будуць ажыццяўляцца ў святле будучых «парламенцкіх выбараў».

Некаторыя прапановы АБСЕ Цэнтрвыбаркам мерыцца ўключыць у свае метадычныя рэкамендацыі для членаў выбарчых камісій на будучых парламенцкіх выбарах, але «сёе-тое, магчыма, пойдзе праз пастановы ЦВК», паведаміў сакратар камісіі Мікалай Лазавік. Гаворкі аб змене выбарчага заканадаўства не ідзе.

Нагадаем, у справаздачы назіральнай місіі БДІПЧ аб выніках прэзідэнцкіх «выбараў» 2015 года адзначалася: «праведзеныя 11 кастрычніка 2015 года сёлетнія прэзідэнцкія выбары зноў паказалі, што Беларусі яшчэ трэба прайсці значны шлях да выканання абавязанняў перад АБСЕ што да дэмакратычных выбараў. Гэта падкрэслівае патрэбу палітычнай волі для правядзення ўсёабдымнага працэсу рэформаў».

Як раней паведамляў сайт charter97.org, «парламенцкія выбары» ў Беларусі пройдуць 11 верасня. Чакаецца, што афіцыйны старт кампаніі будзе дадзены 7 чэрвеня.