На праспекце Незалежнасці з'явіліся фотафіксатары
1- 2.05.2016, 12:26
- 10,511
Камеры пачалі працаваць 2 траўня і будуць ажыццяўляць фіксацыю парушэнняў хуткаснага рэжыму ў абодвух напрамках кожны дзень да канца траўня.
Цяпер камеры фотафіксацыі з'явіліся і на праспекце Незалежнасці ў Менску. Пакуль кантроль устаноўлены на двух кропках, абедзве недалёка ад Уручча. Новаўвядзенне часовае, камеры пачалі працаваць сёння і будуць ажыццяўляць фіксацыю парушэнняў хуткаснага рэжыму ў абодвух напрамках кожны дзень да канца траўня, паведамляе onliner.by.
Першая кропка знаходзіцца на праспекце Незалежнасці каля будынка нумар 156 (АЗС «Беларуснафта»). Інакш кажучы, гэта раён пуцеправода на развязцы праспекта і МКАД. Тут камеры будуць працаваць з 7:00 да 20:00 па цотных днях гэтага месяца.
А па няцотных днях мабільныя датчыкі фотафіксацыі будуць ўстанаўліваць у раёне перасячэння праспекта з вуліцай Рагачоўскай у кірунку да мяжы горада. Час працы той жа.
Выключэнне складуць выхадныя дні 9 і 10 траўня.
Абмежаванні на кожным з участкаў - 80 км/г і для легкавых, і для грузавых аўтамабіляў.
- Мера вымушаная і звязана са шматлікімі парушэннямі на гэтых участках, а таксама іх падвышанай аварыйнасцю, - растлумачылі ў ДАІ Менска.