29 сакавiка 2024, Пятніца, 11:56
Падтрымайце
сайт
Сім сім,
Хартыя 97!
Рубрыкі

Для малога бізнэсу ўрад распрацуе «глабальны план»

63
Для малога бізнэсу ўрад распрацуе «глабальны план»
Архіўныя фота onliner.by

Які шлях развіцця пакажуць прадпрымальнікам чыноўнікі?

Міністэрства эканомікі мае намер распрацаваць Стратэгію развіцця малога і сярэдняга прадпрымальніцтва на перыяд да 2030 года.

Яе мэтай стане «стварэнне спрыяльных умоў фармавання і функцыянавання прадпрымальніцкага асяроддзя», піша Заўтра тваёй краіны.

Ужо зацверджаны склад рабочай групы, якую ўзначаліць намесніца міністра эканомікі Ірына Касцевіч.

А ці патрэбна беларускаму малому і сярэдняму бізнэсу стратэгія, альбо для яго важней развязанне надзённых праблем?

Маргелаў: Малыя прадпрыемствы дапамогуць падняць беларускую эканоміку

- Калі вы збіраеце на машыну, то не кажыце, што гэта дрэнная ідэя, толькі таму, што за год не зможаце яе ажыццявіць, - адзначае сустаршыня Рэспубліканскай канфедэрацыі прадпрымальніцтва Віктар Маргелаў.

- Ніхто не збіраецца пісаць нейкую дэталёвую стратэгію да 2030 года. Але намеціць пэўныя мэты: куды мы імкнёмся, безумоўна, неабходна.

На думку суразмоўцы, галоўнае, каб намечаныя ў стратэгіі ідэі і прапановы сталі асновай для дзейнасці...

- Мэтамі ў такой стратэгіі можа быць пэўны аб'ём вытворчасці, які малы і сярэдні бізнэс зможа за гэтыя гады нарасціць, - кажа ён. - Ці гэта можа быць узровень даходаў і заробкаў у сферы малога прадпрымальніцтва.

Як мяркуе бізнэсоўца, найлепш ставіць такія мэты, чым, да прыкладу, планаваць павелічэнне долі прадпрымальніцтва да 50% ва УБП краіны.

- Дык гэта незразумела што адлюстроўвае: рост малога бізнэсу, ці тое, што ў краіне ўсе прамысловыя прадпрыемствы паваліліся і засталіся толькі прадпрымальнікі, - кажа экспэрт.

Віктар Маргелаў звяртае ўвагу, што ў Еўропе малымі прадпрыемствамі лічацца прадпрыемствы з лікам працаўнікоў да 500 чалавек.

- Менавіта такія кампаніі ў сучаснай эканоміцы з'яўляюцца найбольш гнуткімі і аптымальнымі для таго, каб забяспечыць эканамічны рост, - мяркуе экспэрт. - Іх развіццё дапаможа не толькі абсарбаваць людзей, якіх звальняюць з дзяржаўных прадпрыемстваў, але і ўзняць беларускую эканоміку агулам.

На думку лідара прадпрымальнікаў, бізнэсоўцам сумесна з прадстаўнікамі дзяржавы трэба прадумаць «ланцужок развіцця малога і сярэдняга бізнэсу да канчатковага выніку».

- Каб у выніку ў Беларусі фармаваліся эфектыўныя малыя прадпрыемствы, якія будуць вырабляць прадукцыю, пажадана экспартную, і ствараць новыя працоўныя месцы, - адзначае Віктар Маргелаў.

Балточка: Лепш пакінуць бізнэс у спакоі

Са слоў экспэрта Ліберальнага клуба Антона Балточкі, ужо на першапачатковым этапе створаная стратэгія развіцця МСП выклікае пытанні.

- Я мяркую, што такая стратэгія павінна абмяркоўвацца максімальна публічна, - кажа ён. - Так, заяўлена, што над стварэннем гэтага дакумента будуць працаваць прадстаўнікі не толькі Міністэрства эканомікі, але і бізнэс-хаўрусаў, а таксама Міжнароднай фінансавай карпарацыі.

Экспэрт мяркуе, што такая стратэгія павінна абмяркоўвацца больш шырока: на розных пляцоўках, у тым ліку і з удзелам прадстаўнікоў паспяховых праектаў малога і сярэдняга прадпрымальніцтва.

Эканаміст здзіўляецца: чаму дзяржава задумалася аб стварэнні такой стратэгіі менавіта сёння?

- У сітуацыі, калі бізнэсу складана спрагназаваць, у якіх умовах ён будзе працаваць праз паўгода, распрацоўваць стратэгію да 2030 года - гэта з нейкай пункту гледжання нават смешна, - адзначае аналітык.

У экспэрта таксама ёсць сумненні: ці будзе дакумент, які распрацоўваецца рэалізаваны.

- Сёння бізнэсу, у першую чаргу, неабходна забяспечыць роўныя ўмовы з дзяржаўнымі кампаніямі. Пакуль яны проста існуюць у розных сусветах, - звяртае ўвагу суразмоўца.

Яшчэ адна ўмова, якую трэба выканаць, каб малы і сярэдні бізнэс развіваўся: «пакінуць яго ў спакоі».

- Трэба проста даць бізнэсу магчымасць спакойна працаваць. Калі выканаць гэтыя дзве ўмовы, то ўжо праз год будзе адчувальны вынік, - прагназуе Антон Балточка.

Напісаць каментар 63

Таксама сачыце за акаўнтамі Charter97.org у сацыяльных сетках