Латвія перадала Польшчы новыя запісы аб справе смаленскай катастрофы

Новая камісія расследавання смаленскай катастрофы правярае раней не выкарыстаныя матэрыялы.

Некалькі тыдняў таму Латвія перадала Польшчы новыя аўдыёзапісы, якія тычацца прэзідэнцкага самалёта Ту-154М, які ў 2010 годзе разбіўся пад Смаленскам. Пра гэта напярэдадні паведаміў старшыня Камісіі расследавання cмаленскай катастрофы Вацлаў Бярчынскі ў інтэрв'ю штотыднёвіку wSieci, піша korrespondent.net.

"Цікава, што менавіта ў латышоў быў доступ да перамоў польскага борта з дыспетчарскай вежай у Смаленску. Гэтыя запісы вельмі якасныя і мы спадзяемся, што гэта не маніпуляцыя. Мы параўнаем новыя запісы з тымі, якія мы атрымалі ад расейцаў", - адзначыў Бярчынскі.

Старшыня камісіі таксама заявіў, што частка запісаў гутарак у кабіне пілотаў не была выкарыстаная папярэдняй камісіяй расследавання смаленскай катастрофы (камісія Ежы Мілера).