Судаленка: Уражанне, што ў краіне надзвычайная сітуацыя

Пераслед штрафамі за раздачу друкаваных матэрыялаў, які мы назіраем апошні час, не прапісаны ні ў водным з беларускіх законаў.

У сувязі з заявай АГП пра забарону на распаўсюджванне друкаваных матэрыялаў сітуацыю каментуе для сайта ucpb.org вядомы праваабаронца, старшыня камісіі прававых пытанняў Нацыянальнага Камітэту АГП Леанід Судаленка.

- Права на свабоду меркаванняў і перакананняў, гарантаванае кожнаму з нас Асноўным Законам - Канстытуцыяй краіны і міжнароднымі дамовамі, уключае ў сябе і права свабодна распаўсюджваць усялякага кшталту інфармацыю ды ідэі, - кажа праваабаронца. - Усякае абмежаванне гэтага права найперш павінна быць прапісанае ў законе.

Пераслед вялікімі грашовымі штрафамі за раздачу друкаваных матэрыялаў, які мы назіраем апошні час, не прапісаны ні ў водным з беларускіх законаў.

Сітуацыя, калі суды раздачу інфармацыйных матэрыялаў прыраўноўваюць да несанкцыянаваных акцый, кажа пра тое, што ў краіне ўзнікла надзвычайная сітуацыя, і таму яна прыпыняе дзеянне права на свабоду выказвання меркаванняў і перакананняў.

Было б нармальна, - мяркуе Леанід Судаленка, - калі б гэтую надзвычайную сітуацыю абвясцілі, патлумачылі, у сувязі з чым, на які тэрмін. Аднак гэтага зроблена не было.